চীনৰ পৰা বিশ্বৰ প্ৰায়বোৰ দেশলৈ সম্প্ৰসাৰণ ঘটা মহামাৰী ক’ৰ’না ভাইৰাছে ক্ৰীড়া ক্ষেত্ৰতো ব্যাপক প্ৰভাৱ পেলাইছে। যাৰ বাবে বাতিল নাইবা পিছুৱাবলৈ বাধ্য হৈছে বিভিন্ন টুৰ্ণামেণ্ট।
ভাৰতত ক্ৰমান্বয়ে ক’ৰ’না ভাইৰাছত আক্ৰান্তৰ সংখ্যা বৃদ্ধি পাবলৈ ধৰাত বিশ্বৰ আগশাৰীৰ ক্ৰিকেট লীগ আই পি এলৰ ১৩ সংখ্যক সংস্কৰণটি বি চি চি আইয়ে ১৫ এপ্ৰিললৈকে স্থগিত ৰখাৰ সিদ্ধান্ত লয়।
পূৰ্বতে নিৰ্ধাৰিত কৰি ৰখা সময়সূচি অনুসৰি টুৰ্ণামেণ্টখন অহা ২৯ মাৰ্চৰ পৰা আৰম্ভ হোৱাৰ কথা আছিল। কিন্তু এতিয়া ক’ৰ’নাৰ আতংকৰ বাবে চলিত বছৰৰ আই পি এলৰ সময়সূচি পূৰ্বৰ তুলনাত চমু হ’ব পাৰে বুলি এটা সূত্ৰই প্ৰকাশ কৰিছে।
জানিব পৰা মতে এই সন্দৰ্ভত বি চি চি আই আৰু আই পি এল দলৰ স্বত্তাধিকাৰীসমূহৰ মাজত এখন আলোচনা অনুষ্ঠিত হৈছে। ই?আৰ উপৰি এই বৈঠকত ৬-৭ টা বিকল্প সন্দৰ্ভতো আলোচনা কৰা হয়।
সূত্ৰটোৱে জনোৱা মতে বি চি চি আইৰ লগত একমত হৈছে স্বত্তাধিকাৰীসকল। খেলুৱৈ, দৰ্শক আৰু কৰ্মচাৰীসকলৰ স্বাস্থ্যৰ ক্ষেত্ৰত স্বত্তাধিকাৰীসকল সজাগ বুলি জনায়।
উল্লেখ্য যে উক্ত বৈঠকত আই পি এলৰ ১৩ সংখ্যক সংস্কৰণটি বিদেশত অনুষ্ঠিত কৰাৰ ক্ষেত্ৰত কোনো ধৰণৰ আলোচনা হোৱা নাই।