ৰাজ্যৰ বান পৰিস্থিতিয়ে ক্ৰমে ভয়াৱহ ৰূপ ধাৰণ কৰিছে। বানত আক্ৰান্ত ৰাজ্যখনত মৃত্যুৰ সংখ্যা ১৪ জনলৈ বৃদ্ধি পাইছে। কালি কাছাৰ জিলাত দুজন লোকৰ মৃত্যু হোৱাৰ বিপৰীতে নগাঁও আৰু লখিমপুৰত এজনকৈ লোকৰ মৃত্যু হয়। ৰাজ্যখনৰ ৩৪ খন জিলাৰ ২৯ খন জিলাই বানৰ কবলত পৰিছে। এই দুৰ্যোগৰ ফলত প্ৰায় ৮ লাখ লোক ক্ষতিগ্ৰস্ত হৈছে।
নেৰানেপেৰা বৰষুণৰ ফলত সৃষ্টি হোৱা বান পৰিস্থিতিৰ ফলত ব্যাপক শস্য ক্ষতিগ্ৰস্ত হোৱাৰ আশংকা কৰা হৈছে। ৮০০৩৬.৯০ হেক্টৰ ভূমি পানীৰ তলত ডুব গৈছে। ২৯ খন জিলাৰ ২,২৫১ খন গাওঁ ক্ষতিগ্ৰস্ত হৈছে। ২৩৪ টা সাহায্য শিবিৰত ৭৪,৭০৫ৰো অধিক লোকে আশ্ৰয় লৈছে।
লগতে পঢ়ক: ন্যায়ালয়ৰ মজিয়াত উন্মোচিত হ‘ল হাইস্কুল টে’ট পৰীক্ষা ব্যাপক ফলাফল বিসংগতি: ডি ৱাই এফ আই
এইবাৰ বানত ডিমা হাচাও জিলা আটাইতকৈ বেছি ক্ষতিগ্ৰস্ত হৈছে। জিলাখনত ২৪ মেট্ৰিক টন খাদ্য বিতৰণ কৰা হৈছে। আৱদ্ধ হৈ থকা ২৬৯ জন লোকক উদ্ধাৰ কৰা হৈছে। অসম চৰকাৰে ক্ষতিগ্ৰস্ত লোকসকলক সহায় কৰিবলৈ কাছাৰ আৰু ডিমা হাচাও জিলালৈ ২ কোটি টকা আৱণ্টন দিছে।
মুখ্যমন্ত্ৰী হিমন্ত বিশ্ব শৰ্মাই বানপীড়িত জিলাসমূহলৈ ১৫০ কোটি টকা আৱণ্টন দিয়া হৈছে বুলি জানিবলৈ দিছে। কেন্দ্ৰীয় চৰকাৰে এহাজাৰ হাজাৰ কোটি টকা আৱণ্টন দিয়াৰ কথাও তেওঁ জানিবলৈ দিছে।
কেন্দ্ৰীয় গৃহমন্ত্ৰী অমিত শ্বাহে মুখ্যমন্ত্ৰী হিমন্ত বিশ্ব শৰ্মাৰ সৈতে বান পৰিস্থিতিৰ বিষয়ে ফোনযোগে কথা পাতিছে। এক টুইটযোগে শ্বাহে কয়, “এন ডি আৰ এফৰ দল ইতিমধ্যে মোতায়েন কৰা হৈছে। কেন্দ্ৰৰ দ্বাৰা সকলো সহায় নিশ্চিত কৰা হৈছে।‘’
ইপিনে, মুখ্যমন্ত্ৰীয়ে ৰাজ্যৰ মুখ্যসচিৱক আটাইতকৈ বেছি ক্ষতিগ্ৰস্ত হোৱা ডিমা হাচাওকে ধৰি অসমৰ আন জিলাসমূহৰ পৰিস্থিতি পৰ্যালোচনা কৰিবলৈ নিৰ্দেশ দিছে।
লগতে পঢ়ক: জ্ঞানৱাপী মছজিদ বিতৰ্ক: উচ্চতম ন্যায়ালয়ে বাৰাণসী জিলা ন্যায়াধীশৰ ওচৰলৈ পঠিয়ালে গোচৰ
ৰাজ্যিক দুৰ্যোগ ব্যৱস্থপনা কৰ্তপক্ষই জানিবলৈ দিয়া মতে বানত হাজাৰ হাজাৰ ঘৰ ক্ষতিগ্ৰস্ত হৈছে আৰু লাখ লাখ বিঘা ভূমি পানীৰ তলত আছে। নিউ হাফলঙৰ ৰে’লপথত ভূমিস্খলনৰ ফলত প্ৰায় ২,৮০০ যাত্ৰী ৰে’লৰ ভিতৰত আৱদ্ধ হৈ পৰাৰ পিছত তেওঁলোকক উদ্ধাৰ কৰা হয়। বেছিভাগ যাত্ৰীক বায়ুসেনাৰ হেলিকপ্টাৰেৰে উদ্ধাৰ কৰা হয়।