১৬ বছৰীয়া নাবালক ছোৱালীৰ বলপূৰ্বক বিবাহৰ অভিযোগ উত্থাপন কৰি উচ্চতম ন্যায়ালয়ে বিহাৰ চৰকাৰলৈ জাননী জাৰি কৰিছে। একে সময়তে ছোৱালীজনী আৰু তেওঁৰ বন্ধুৰ সুৰক্ষা সুনিশ্চিত কৰাৰ বাবেও নিৰ্দেশ জাৰি কৰা হৈছে। অভিযোগ অনুসৰি ছোৱালীগৰাকী পৰিয়াল গঢ়িব নিবিচৰাৰ বাবে বাৰে বাৰে ভাবুকি দিয়া হৈছে। সেয়ে নাবালিকাগৰাকীয়ে সুৰক্ষা বিচাৰি উচ্চতম ন্যায়ালয়ৰ কাষ চাপিছিল।
জানিব পৰা মতে, বিহাৰৰ কিশোৰীগৰাকীয়ে পঢ়া-শুনা কৰি নিজৰ ভৰিৰ ওপৰত থিয় দিব বিচাৰিছিল। কিন্তু মাত্ৰ ১৬ বছৰ বয়সতে ছোৱালীগৰাকীৰ ইচ্ছাৰ বিৰুদ্ধে ৩৩ বছৰীয়া এজন ব্যক্তিৰ সৈতে বিবাহপাশত আবদ্ধ হয়। ২০২৩ চনৰ ৯ ডিচেম্বৰত বিয়াৰ লগে লগে তাইক শহুৰেকৰ ঘৰলৈ পঠিওৱা হৈছিল।সেই সময়ত কিশোৰীগৰাকীয়ে মাধ্যমিকৰ পৰীক্ষাৰ বাবে প্ৰস্তুতি চলাই আছিল। কিশোৰীগৰাকীয়ে আৰম্ভণিৰে পৰা পৰিয়াল গঢ়িব বিচৰা নাছিল। কিন্তু কোনেও কিশোৰীগৰাকীক দেউতাকৰ ঘৰলৈ লৈ যোৱা নাছিল। ইয়াৰ বিপৰীতে তেওঁলোকে ইয়াক বিভিন্ন ধৰণে বুজাবলৈ চেষ্টা কৰিছে।
ছোৱালীজনীৰ শহুৰেকে দাবী জনাইছে যে তেওঁলোকে বিয়াখনৰ বাবে বহুত টকা খৰচ কৰিছিল আৰু এতিয়া তেওঁলোকে বিচাৰিছে এজন ‘উত্তৰাধিকাৰী’। আনহাতে, পেছাত ঠিকাদাৰ কিশোৰীগৰাকীৰ স্বামীয়ে কয় যে, “তাইৰ (পত্নীৰ) পৰিয়াল আমাৰ ওচৰত ঋণী, গতিকে তাই আমাৰ লগত থাকিবলৈ বাধ্য হৈছে।” শাৰীৰিক সংগমৰ বাবে সন্মতি নিদিয়াৰ বাবে তেওঁক প্ৰায়ে প্ৰহাৰ কৰা বুলিও অভিযোগ উত্থাপন হৈছে। আনকি নাবালকজনৰ স্বামীৰ বিৰুদ্ধে গুৰুতৰ অভিযোগ উত্থাপন হৈছে যে তেওঁ ৰাজহুৱাভাৱে ভাবুকি দিছিল, “মই তাইক হত্যা কৰিলে জেললৈ যাবলৈ ইচ্ছুক।”
জানুৱাৰী মাহৰ দ্বিতীয় সপ্তাহত বহু প্ৰতিকূলতাৰ মাজতো তেওঁ মাধ্যমিক বিদ্যালয়ৰ পৰীক্ষাত উত্তীৰ্ণ হয়। তাৰ পাছত যেতিয়া কিশোৰীগৰাকীক শহুৰেকৰ ঘৰলৈ ঘূৰাই পঠিয়াবলৈ হেঁচা পৰিল, তেতিয়া নাবালকজনীয়ে বাট বিচাৰি নাপাই বন্ধু এজনৰ সৈতে পলাই গ’ল। ৩১ মাৰ্চত তেওঁলোকে প্ৰথম বাৰাণসীলৈ গৈছিল। তেওঁলোকৰ সন্ধানত আৰক্ষীৰ ওচৰত এজাহাৰ দাখিল কৰা হয়। কিশোৰীগৰাকীৰ পৰিয়ালে অপহৰণৰ অভিযোগ উত্থাপন কৰি বন্ধুৰ লগতে পিতৃ, মাতৃ আৰু ককাকৰ বিৰুদ্ধে এফআইআৰ দাখিল কৰিছে।
উচ্চতম ন্যায়ালয়ক জনোৱা মতে, বন্ধুৰ পৰিয়ালকো হেঁচা প্ৰয়োগ কৰি ছোৱালীজনীক মুকলি কৰি দিয়াৰ ভাবুকি দিয়া হৈছে। আনকি তেওঁৰ পিতৃকো ভুৱা অভিযোগত গ্ৰেপ্তাৰ কৰা হৈছে। এই গ্ৰেপ্তাৰৰ উদ্দেশ্য আছিল কেৱল বন্ধুক ভয় খুৱাই ছোৱালীজনীক পৰিয়ালৰ ওচৰলৈ ঘূৰাই অনা। আবেদনখনত উল্লেখ কৰা হৈছে যে ৰাজ্য প্ৰশাসনে ‘The Prohibition of Child Marriages Act, 2006’ৰ নিৰ্দেশনা অনুসৰি বিহিত ব্যৱস্থা গ্ৰহণ কৰা নাই। অভিযোগৰ ভিত্তিত এই বিষয়ত হস্তক্ষেপ কৰিলে উচ্চতম ন্যায়ালয়ে। এই গোচৰৰ পৰৱৰ্তী শুনানি ১৫ জুলাইত হ’ব।
