ধ্বংসৰ বিভীষিকাৰ মাজতেই সৃষ্টিৰ বীজ৷ সাগৰৰ পৰা ওলাই অহা ডানাই ওড়িশাত সন্ত্ৰাস চলাইছে। সেই ভয়াৱহ দুৰ্যোগৰ মাজতে সাহায্য শিবিৰত ১৬০০ নৱজাতকৰ জন্ম হয়। দুৰ্যোগৰ মাজতে খোদ ওড়িশাৰ মুখ্যমন্ত্ৰী মোহন চৰণ মাঝিয়ে এই ভাল খবৰ দিয়ে।
বৃহস্পতিবাৰে নিশা ১১:১২ বজাৰ পৰা স্থলপথত প্ৰৱেশৰ প্ৰক্ৰিয়া আৰম্ভ হয়। ভৱিষ্যদ্বাণী কৰা মতে ধমৰা আৰু ভিতৰকণিকাৰ মাজৰ অঞ্চলত ঘূৰ্ণীবতাহ ডানাই আঘাত হানে। প্ৰায় ৯ ঘণ্টা ধৰি স্থলপথত প্ৰৱেশৰ প্ৰক্ৰিয়া চলি থকা বুলি বতৰ বিজ্ঞান বিভাগে জানিবলৈ দিয়ে। শুকুৰবাৰে পুৱা আঠ বজালৈকে স্থলপথত প্ৰৱেশ কৰিলে ‘ডানা’। স্থলপথত প্ৰৱেশৰ সময়ত ঘণ্টাত ১১০ কিলোমিটাৰ বেগেৰে ধুমুহাই বংগ আৰু ওড়িশাৰ উপকূলীয় অঞ্চলত আঘাত হানে। পৰিস্থিতি চম্ভালিবলৈ ওড়িশা চৰকাৰে প্ৰস্তুতিৰ পৰ্যায় সম্পূৰ্ণ কৰিছিল। উপকূলীয় অঞ্চলৰ পৰা কমেও ৬ লাখ লোকক নিৰাপদ আশ্ৰয়স্থললৈ স্থানান্তৰ কৰা হয়। ৪ হাজাৰ ৫০০ গৰ্ভৱতী মহিলাও এই তালিকাত আছিল। ইয়াৰে ১৬০০ গৰাকীয়ে সন্তান জন্ম দিয়ে। বৃহস্পতিবাৰে মুখ্যমন্ত্ৰীয়ে ৰাজহুৱা কৰিলে এই তথ্য।
ওড়িশাৰ মুখ্যমন্ত্ৰীয়ে কয় যে এই আক্ৰমণৰ ফলত হোৱা ক্ষতি হ্ৰাস কৰিবলৈ প্ৰশাসনে যৎপৰোনাস্তি চেষ্টা চলাইছে। মুকলি কৰা হ’ল ৬০০৮টা সাহায্য শিবিৰ। তাত পানী, ঔষধ, খাদ্যকে ধৰি সকলো প্ৰয়োজনীয় বস্তুৰ ব্যৱস্থা কৰা হয়। কেৱল বালাসুৰৰ পৰাই প্ৰায় ১ লাখ ৭৩ জন লোকক উচ্ছেদ কৰা হয়। ময়ুৰভঞ্জ জিলাত এই সংখ্যা আছিল প্ৰায় এক লাখ।
কিন্তু ‘ডানা’ৰ স্থলভাগৰ তাণ্ডৱৰ বাবে ওড়িশাত বহু গছ সৰি পৰাৰ খবৰ পোৱা গৈছে। ধমৰাৰ কেইবাটাও অঞ্চলত গছ-গছনি সৰি পৰাৰ বাবে পথটো বন্ধ হৈ পৰিছে। অৱশ্যে তাতেই ইতিমধ্যে উভালি পেলোৱা গছবোৰ কটাৰ কাম আৰম্ভ হৈছে। ভুৱনেশ্বৰত বহি পৰিস্থিতিৰ ওপৰত চকু ৰাখিছে ওড়িশাৰ মুখ্যমন্ত্ৰী মোহন চৰণ মাঝিয়ে। স্থলপথত অৱতীৰ্ণ হোৱাৰ পিছত দুৰ্যোগ ব্যৱস্থাপনা মন্ত্ৰী আৰু মুখ্য সচিবৰ সৈতেও বৈঠকত বহিছিল। ঘূৰ্ণীবতাহৰ ফলত ওড়িশাৰ কেইবাখনো জিলাত ধাৰাসাৰ বৰষুণ হৈ আছে।
