‘ যেতিয়ালৈ আকাশত জোন-বেলি থাকিব তেতিয়ালৈ অসমৰ হৈ ৰ’ব বিপিন ৰাৱাট’ ধ্বনিৰ মাজৰেই পঞ্চভূতত বিলীন হ’ল চিডিএছ বিপিন ৰাৱাট আৰু তেওঁৰ পত্নী মধুলিকা ৰাৱাটৰ নশ্বৰ দেহ।
আজি বিয়লি নতুন দিল্লীৰ ব্ৰাৰ স্কোৱেৰ শ্মশানত সম্পূৰ্ণ সামৰিক মৰ্যাদাৰে ৰাৱাট দম্পতিৰ অন্ত্যেষ্টিক্ৰিয়া সম্পন্ন কৰা হয়। শেষ যাত্ৰা আৰম্ভ হৈছিল।
সামৰিক বাহিনীয়ে ১৭ টা টোপ ধ্বনিৰে বিপিন ৰাৱাটক শেষ বিদায় জনায়।এই শেষকৃত্যঅনুষ্ঠানত উপস্থিত দেশ-বিদেশৰ বহু গণ্য-মান্য ব্যক্তি।
আজি দিন ভাগত নতুন দিল্লীৰ ৰাজপথত শ শ লোকে ৰাৱাট দম্পতিৰ শেষ যাত্ৰাত অংশগ্ৰহণ কৰে।
আজি দিনৰ ১০ বজাৰ পৰা ১-৩০ বজালৈ সেনাই সাধাৰণ লোকক শ্ৰদ্ধাঞ্জলি জ্ঞাপনৰ সুবিধা প্ৰদান কৰে।
পুৱাৰ ভাগত কেন্দ্ৰীয় গৃহমন্ত্ৰী অমিত শ্বাহ, কংগগ্ৰেছৰ নেতা ৰাহুল গান্ধী, দিল্লীৰ মুখ্যমন্ত্ৰী অৰবিন্দ কেজৰিৱাল, উত্তৰাখণ্ডৰ মুখ্যমন্ত্ৰী পুষ্কৰ সিং ধামি আদিয়ে ৰাৱাট দম্পতিৰ নশ্বৰ দেহত পুস্পাঞ্জলি অৰ্পন কৰে।
দুপৰীয়াৰ ভাগত ৰাৱাট দম্পতিৰ নশ্বৰ দেহ ব্ৰাৰ শ্মশান অভিমুখে সমদল কৰি লৈ যোৱা হয়। ব্ৰাৰ স্কোৱেৰ শ্মাশানত শেষকৃত্য অনুষ্ঠানৰ বাবে যাৱতীয় সকলো প্ৰস্তুতি সম্পূৰ্ণ কৰি তোলে সেনা বাহিনীৰ বিষয়া-জোৱান সকলে।
সম্পূৰ্ণ সামৰিক মৰ্যাদাৰে সম্পন্ন কৰা হয় ৰাৱাটৰ শেষকৃত । সেইমৰ্মে নিৰাপত্তা বাহিনীৰ ৮০০ জোৱানক শ্মশানত সাজু কৰি ৰখা হৈছিল।
সামৰিক প্ৰট’কল অনুসৰি ১৭ টা টোপ ধ্বনিৰে চিডিচি বিপিন ৰাৱাটক শেষ বিদায় জনোৱা হয়।
ৰাৱাটৰ শেষকৃত্য অনুষ্ঠানত উপস্থিত থাকে শ্ৰীলংকা, ভূটান,নেপাল, বাংলাদেশৰ জ্যেষ্ঠ সামৰিক কামাণ্ডাৰসকল।
শেষকৃত্য অনুষ্ঠানত প্ৰধানমন্ত্ৰী নৰেন্দ্ৰ মোদীৰ লগতে মোদী মন্ত্ৰীসভাৰ ভালে কেইগৰাকী মন্ত্ৰী উপস্থিত থাকে।
কালি নতুন দিল্লীৰ পালাম বিমান বন্দৰ আহি পোৱাৰ পিছতে বিমান বন্দৰতে প্ৰধানমন্ত্ৰী মোদী, কেন্দ্ৰীয় গৃহ মন্ত্ৰী অমিত শ্বাহ, কেন্দ্ৰীয় প্ৰতিৰক্ষা মন্ত্ৰী ৰাজনাথ সিং,ৰাষ্ট্ৰীয় প্ৰতিৰক্ষা মন্ত্ৰী অজিত ডোভাল আদিয়ে শ্ৰদ্ধাঞ্জলি জ্ঞাপন কৰিছিল।
ইপিনে ৰাৱাটৰ মৃত্যুত গভীৰ শোক প্ৰকাশ কৰি ফ্ৰান্স, ব্ৰিটেইনকে ধৰি বিশ্বৰ বহু দেশৰ ৰাজনীতিক তথা শীৰ্ষ প্ৰতিৰক্ষা বিষয়াসকলে শোকবাৰ্তা প্ৰেৰণ কৰিছে।
আজিৰ শেষকৃত্য অনুষ্ঠানত ৰাৱাট দম্পতিৰ দুই কন্যাই শোকত ভাগি পৰে। তেওঁলোকক সান্ত্বনা দিবলৈও যেন সকলোৰে মুখৰ ভাষা হেৰাই গৈছিল।
