আমেৰিকাৰ ৱাশ্বিংটনত ৬৪ জন যাত্ৰী কঢ়িয়াই নিয়া এখন যাত্ৰীবাহী বিমান আৰু এখন সামৰিক হেলিকপ্টাৰৰ মাজত মাজ আকাশত সংঘটিত সংঘৰ্ষৰ ফলত দুৰ্ঘটনাগ্ৰস্ত হৈ নদীত পৰা ঘটনাত এতিয়ালৈ কমেও ১৮টা মৃতদেহ উদ্ধাৰ কৰা হৈছে। এজন আৰক্ষী বিষয়াৰ উদ্ধৃতি দি চিবিএছ নিউজে এই খবৰ প্ৰকাশ কৰিছে।
ইফালে, দুটা সূত্ৰই ৰয়টাৰক জনোৱা মতে, নদীখনৰ পৰা কেইবাটাও মৃতদেহ উদ্ধাৰ কৰা হৈছে।
বুধবাৰে নিশা (২৯ জানুৱাৰী) ৰ’নাল্ড ৰেগান ৱাশ্বিংটন ৰাষ্ট্ৰীয় বিমানবন্দৰৰ সমীপত আমেৰিকান এয়াৰলাইন্সৰ এখন ঘৰুৱা যাত্ৰীবাহী বিমানৰ সৈতে আমেৰিকাৰ সামৰিক ব্লেক হক হেলিকপ্টাৰ সংঘৰ্ষ হয়। ইয়াৰ পিছতে বিমান আৰু হেলিকপ্টাৰখন বিধ্বস্ত হৈ হিমচেঁচা প’ট’মেক নদীত পৰে।
আমেৰিকান এয়াৰলাইন্স কৰ্তৃপক্ষই নিশ্চিত কৰিছে যে তেওঁলোকৰ নিয়ন্ত্ৰণত থকা বিমানখনত ৬৪ জন যাত্ৰী আছিল। ইয়াৰে ৬০ জন যাত্ৰী আৰু ৪ জন বিমানকৰ্মী। আন এগৰাকী আমেৰিকান বিষয়াই জনায় যে হেলিকপ্টাৰখনত তিনিজন সেনা জোৱান আছিল।
আমেৰিকান সেনাৰ যুটীয়া টাস্ক ফ’ৰ্চ-নেচনেল কেপিটেল ৰিজিঅ’নৰ সংবাদ মাধ্যমৰ সম্পৰ্কৰ মুৰব্বী হিদাৰ চেইৰেজে চিবিএছ নিউজক জনোৱা মতে, সামৰিক হেলিকপ্টাৰখন প্ৰশিক্ষণ বিমান আছিল।
ইতিমধ্যে বিমানবন্দৰত যাত্ৰীসকলৰ আত্মীয়ৰ ভিৰ লাগিছে। তেওঁলোকে এই সন্দৰ্ভত কৰ্তৃপক্ষৰ পৰা কোনো তথ্য লাভ কৰা নাই বুলি জানিবলৈ দিয়ে। বৰং তেওঁলোকে বিভিন্ন সংবাদ মাধ্যমৰ বাতৰিৰ পৰাহে অধিক তথ্য লাভ কৰিছে।
২০০৯ চনৰ ফেব্ৰুৱাৰী মাহৰ পিছত আমেৰিকাত যাত্ৰীবাহী বিমানত কোনো প্ৰাণঘাতী দুৰ্ঘটনা হোৱা নাই। কিন্তু শেহতীয়া বছৰবোৰত বিমানৰ এনে কিছুমান ঘটনা সংঘটিত হৈছে যিবোৰত হতাহত হোৱাৰ সম্ভাৱনা আছিল। ইয়াৰ ফলত গুৰুতৰ উদ্বেগৰ সৃষ্টি হৈছে।
১৯৮২ চনত এয়াৰ ফ্ল’ৰিডা ফ্লাইট ৯০ প’ট’মেক নদীৰ ওপৰত ১৪ নং ষ্ট্ৰীট ব্ৰীজত বিধ্বস্ত হৈছিল। এই ঘটনাত ৭০ জন যাত্ৰী আৰু ৪ জন ক্ৰু মেম্বাৰ নিহত হৈছিল। মাত্ৰ চাৰিজন যাত্ৰী আৰু এজন ক্ৰু মেম্বাৰহে ৰক্ষা পৰিছিল।
