কোবিড১৯ৰ সংক্ৰমণে পুনৰ গম্ভীৰ ৰূপ লৈছে মহাৰাষ্ট্ৰত।
ৰাজ্যখনৰ ৱাছিম জিলাত এটা হোষ্টেলত শিক্ষাৰ্থী আৰু শিক্ষকসহ ১৯০ গৰাকীৰ শৰীৰত ধৰা পৰিছে কোভিড১৯।
ইয়াৰ মাজত ১৮৬ গৰাকী শিক্ষাৰ্থী আৰু চাৰিগৰাকী শিক্ষক আছে। ইতিমধ্যে হোষ্টেলটোৰ বিদ্যালয়খনক কনটেইমেন্ট জ’ন হিচাপে ঘোষণা কৰিছে প্ৰশাসনে।
জানিব পৰা মতে হোষ্টেলটোত কোভিড আক্ৰান্ত শিক্ষাৰ্থীসকলৰ বেছিভাগেই অমৰাৱতী আৰু যাৱতমল জিলাৰ।
উল্লেখ্য যে যোৱা কেইটামান সপ্তাহৰ পৰা উক্ত দুয়োখন জিলাতে কোভিড১৯ৰ সংক্ৰমণ বৃদ্ধি পাই আহিছে।
আনহাতে যোৱা মংগলবাৰে ৱাছিম জিলাৰ এটা মন্দিৰৰ সমীপত শিৱসেনাৰ এগৰাকী মন্ত্ৰী সঞ্জয় ৰাথোড়ে কোভিড প্ৰটক’ল ভংগ কৰি এখন জনবহুল সভা অনুষ্ঠিত কৰিছিল। উক্ত গণসমাৱেশত এগৰাকী মহিলাৰ মৃত্যু হোৱা বুলিও বিৰোধীয়ে অভিযোগ কৰিছে।
ৰাজ্যখনত কোভিডে পুনৰ তড়িৎ গতিত সংক্ৰমণ ঘটাৰ সময়তে ৰাজ্যখনৰ মন্ত্ৰী এগৰাকীয়ে কোভি প্ৰটক’ল ভংগ কৰি সমাৱেশ আয়োজন কৰাতো সহজ ভাৱে ল’ব পৰা বিৰোধীৰ লগতে জিলাৰ সচেতন জনতাই।
মুখ্যমন্ত্ৰী উদ্ধৱ থাকৰেই ৰাজ্যখনত কঠোৰভাৱে কোভিড প্ৰট’কল বলৱৎ কৰিবলৈ প্ৰশাসনক নিৰ্দেশ দিছে। কোভিড প্ৰট’কল ভংগকাৰীৰ বিৰুদ্ধে প্ৰশাসনক কঠোৰ পদক্ষেপ গ্ৰহণ কৰিবলৈও নিৰ্দেশ দিছে মুখ্যমন্ত্ৰী থাকৰেই।
ৰাজনৈতিক সমাৱেশ, ধৰ্মীয় সমাৱেশ, সামাজিক আদি সকলো সমাৱেশ নিষিদ্ধ কৰা হৈছে ৰাজ্যখনত।
মহাৰাষ্ট্ৰত বুধবাৰে ৮,৮০০ গৰাকী কোভিড আক্ৰান্ত ধৰা পৰা লগতে ৮০ গৰাকী আক্ৰান্তৰ মৃত্যু ঘটিছে।
