উত্তৰপ্ৰদেশ : মৃত অৱস্থাত উদ্ধাৰ দলিত সম্প্ৰদায়ৰ দুগৰাকী নাবালিকা, আৰক্ষীৰ তদন্ত অব্যাহত
বুধবাৰে বিয়লী উত্তৰপ্ৰদেশৰ উন্নাও জিলাৰ বাবুৰাহা গাঁৱৰ এখন পথাৰত দুজনী দলিত সম্প্ৰদায়ৰ নাবালিকা কন্যাৰ মৃতদেহ উদ্ধাৰ কৰা হয়।
মৃত নাবালিকা দুগৰাকীৰ নামসমূহ ক্ৰমে কাজল (১৩) আৰু কোমল (১৬)।
নাবালিকা দুগৰাকীৰ স’তে একে ঠাইতে আন এগৰাকী যুৱতীকো অচেতন অৱস্থাত উদ্ধাৰ কৰা হয় বুলি আৰক্ষীয়ে জনায়।
আৰক্ষীয়ে জনোৱা মতে, উদ্ধাৰ কৰা ৰশ্নী নামৰ ১৭ বছৰ বয়সীয়া যুৱতীগৰাকীক কানপুৰৰ চিকিৎসালয়লৈ পঠোৱা হয় আৰু পৰিস্থিতি বৰ্তমান সংকটজনক।
প্ৰাথমিক অনুসন্ধানত লাভ কৰা তথ্য অনুসৰি আৰক্ষীয়ে জনায় যে বিষাক্ত দ্ৰব্য ভক্ষণ কৰাৰ ফলতে নাবালিকা দুগৰাকীৰ মৃত্যু হয়।
উন্নাওৰ আৰক্ষীয়ে সংবাদ মাধ্যমক দিয়া বিবৃত্তিত কয় যে নাবালিকাকেইগৰাকীয়ে ঘৰৰ পথাৰত ঘাঁহ কাটিবলৈ গৈছিল। তেওঁলোকে বহু ঘণ্টা ধৰি ঘৰলৈ ঘূৰি নহাত পৰিয়ালৰ সদস্যই বিচাৰি যায় আৰু অচেতন অৱস্থাত নাবালিকাকেইগৰাকীক উদ্ধাৰ কৰে।
তদুপৰি আৰক্ষীয়ে কয় যে নাবালিকাকেইগৰাকীৰ ওপৰত আশংকা কৰা যৌন নিৰ্যাতনৰ কোনো প্ৰমাণ তেওঁলোকে লাভ কৰা নাই।
পৰিয়ালৰ সদস্যই নাবালিকাকেইগৰাকীৰ হাত দুখন বন্ধা অৱস্থাত উদ্ধাৰ কৰা হৈছিল বুলি সাংবাদিকক জনাইছে যদিও আৰক্ষীয়ে ইয়াক নস্যাৎ কৰিছে।
ইতিমধ্যে আৰক্ষীয়ে অঞ্চলটোত নিৰাপত্তা বেষ্টনী গঢ়ি তুলিছে আৰু তদন্ত অব্যাহত ৰাখিছে।