নৰেন্দ্ৰ মোডী নেতৃত্বাধীন কেন্দ্ৰৰ বিজেপি চৰকাৰে অতি অগ্ৰাসীভাৱে শ্ৰমিক বিৰোধী আৰু মালিক শ্ৰেণীৰ স্বাৰ্থ ৰক্ষাকাৰী আইন প্ৰস্তুত কৰা, নৱ্য উদাৰবাদী অৰ্থনৈতিক নীতি ক্ষীপ্ৰতাৰে ৰূপায়ণ কৰি গুৰুত্বপূৰ্ণ ৰাজহুৱা শিল্পক্ষেত্ৰকে ধৰি সকলো ধৰণৰ ৰাজহুৱা খণ্ডৰ শিল্প প্ৰতিষ্ঠান বেচৰকাৰীকৰণ আহিছে।
ৰাজহুৱা খণ্ডৰ বেংক, বীমা, ৰেল, প্ৰতিৰক্ষা আৰু তেল আদি ব্যক্তিগতকৰণ হ’বলৈ ধৰিছে। কৰ্মৰত শ্ৰমিক কৰ্মচাৰীৰ ওপৰত কামৰ বোজা বৃদ্ধি কৰাৰ উপৰিও ব্যাপক হাৰত ঠিকাকৰণে শ্ৰমিক শ্ৰেণীক নিৰাপত্তাহীনতাত ভুগাইছে।
আনহাতে অংগনবাদী কৰ্মী সহায়িকা, ৰন্ধন কৰ্মী, আশাকৰ্মী আদি বিভিন্ন আঁচনিভূক্ত কৰ্মচাৰী আৰু নিৰ্মাণ ক্ষেত্ৰকে ধৰি অসংগঠিত ক্ষেত্ৰৰ শ্ৰমিকসকলৰ ধাৰাবাহিক আন্দোলনৰ পিছতো সেই সকল শ্ৰমিক কৰ্মচাৰীক ন্যায্য প্ৰাপ্যৰ পৰা বঞ্চিত কৰি অহা হৈছে।
কেন্দ্ৰৰ বিজেপি চৰকাৰৰ এনে ধৰণৰ জন বিৰোধী নীতিৰ বিৰুদ্ধে দেশৰ ট্ৰেড ইউনিয়ন সমূহৰ যৌথ মঞ্চই অহা ৮ আৰু ৯ জানুৱাৰীৰ দিনা আহ্বান জনোৱা দুদিনীয়া দেশজোৰা সাধাৰণ ধৰ্মঘটৰ সমৰ্থনত আজি হোজাইত সহস্ৰাধিক পুৰুষ মহিলা ৰাজপথলৈ ওলাই আহিল।
বামপন্থী ট্ৰেড ইউনিয়ন সংগঠন চিআইটিইউ, এআইটিইউচিৰ অধীনস্থ কেবাটাও সংগঠনৰ কৰ্মী সদস্যই দিনৰ ১২-০০ বজাত হোজাই ৰেলৱে ষ্টেচনৰ সমীপৰ পৰা এক সমদল উলিয়ায়। সমদলকাৰী সকলে চহৰখনৰ মাজমজিয়াৰে বিজেপি মুৰ্দাবাদ, নৰেন্দ্ৰ মোডী হুচিয়াৰ, শ্ৰমিক আৰু কৃষক বিৰোধী বিজেপি গ`বেক আদি শ্লগানেৰে চহৰখনৰ পৰিৱেশ উত্তাল কৰি তোলে। সমদলকাৰী সকলে সমগ্ৰ চহৰখনতে এক প্ৰতিবাদী পৰিৱেশ সৃষ্টি কৰি দুদিনীয়া সাধাৰণ ধৰ্মঘট সফল কৰাৰ বাবে ৰাইজৰ সমৰ্থন আদায়ৰ চেষ্টা চলায়।
দুদিনীয়া ধৰ্মঘটত ব্যৱসায়িক প্ৰতিষ্ঠান, বেংক, বীমা প্ৰতিষ্ঠান আৰু সকলো ধৰণৰ যান-বাহন বন্ধ ৰখাৰো আহ্বান জনায়। সমদলত নেতৃত্ব দিয়া ট্ৰেড ইউনিয়নৰ নেতা যজ্ঞেশৰ দাস, দেৱ ভট্টাচাৰ্য্য, নুৰুল ইছলাম, শ্বামিম আজাদ, আব্দুৰ ৰূফ, নুৰুল হকে বিজেপিৰ জন বিৰোধী নীতিৰ কঠোৰ সমালোচনা কৰে।