সুদীৰ্ঘ ২০ বছৰৰ পাছত শনিবাৰে মুম্বাইৰ এখন বিশেষ আদালতে ২০০৬ চনৰ মহাৰাষ্ট্ৰৰ কংগ্ৰেছ নেতা পৱনৰাজে নিম্বালকাৰ আৰু তেওঁৰ চালকৰ হত্যাৰ গোচৰত আটাইকেইজন অভিযুক্তক দোষমুক্ত বুলি ঘোষণা কৰিছে।
২০০৬ চনৰ ৩ জুন তাৰিখে নিম্বালকাৰ আৰু তেওঁৰ চালক ছামাদ কাজীয়ে মুম্বাইৰ পৰা ওচমানাবাদলৈ গৈ থকা অৱস্থাত নৱী মুম্বাইৰ কলাম্বোলীত দুজন দুৰ্বৃত্তই তেওঁলোকৰ গাড়ীখন ৰখাই গুলীয়াই দুয়োকে থিতাতে হত্যা কৰিছিল।
এই চাঞ্চল্যকৰ হত্যাৰ গোচৰত নিম্বালকাৰৰ সম্পৰ্কীয় ভাতৃ তথা এন চি পিৰ প্ৰাক্তন সাংসদ পদমসিং পাটিলৰ নামো সাঙোৰ খাইছিল। পাটিলৰ উপৰিও এই গোচৰত লাটুৰৰ ব্যৱসায়ী সতীশ মানদাদে, অৱসৰপ্ৰাপ্ত ৰাজ্যিক আবকাৰী পৰিদৰ্শক মোহন শুক্লা আৰু গুলীচালনা কৰা লোককেইজনো অভিযুক্ত আছিল।
পৱনৰাজে নিম্বালকাৰ ওচমানাবাদ জিলাৰ এজন আগশাৰীৰ কংগ্ৰেছ নেতা আছিল। তেওঁ লাহে লাহে এজন জনপ্ৰিয় ৰাজনৈতিক নেতা হিচাপে আত্মপ্ৰকাশ কৰিছিল আৰু অঞ্চলটোত জ্যেষ্ঠ এন চি পি নেতা পদমসিং পাটিলৰ আধিপত্যৰ প্ৰতি এক ডাঙৰ প্ৰত্যাহ্বান হৈ পৰিছিল। আদালতত দিয়া ভাষ্য অনুসৰি, নিম্বালকাৰে প্ৰথম অৱস্থাত পাটিলৰ সমৰ্থনতেই ৰাজনীতিত খোজ পেলাইছিল আৰু তেৰ্ণা চেনী কল আৰু ওচমানাবাদ জিলা কেন্দ্ৰীয় সমবায় বেংকৰ দৰে প্ৰতিষ্ঠানত দায়িত্ব লাভ কৰিছিল। কিন্তু নিম্বালকাৰৰ ৰাজনৈতিক প্ৰভাৱ বৃদ্ধি পোৱাৰ লগে লগে দুয়োগৰাকী নেতাৰ মাজৰ সম্পৰ্ক বেয়া হ’বলৈ ধৰে। নিম্বালকাৰৰ পুত্ৰ তথা বৰ্তমানৰ শিৱসেনা সাংসদ ওমৰাজে নিম্বালকাৰে আদালতত জনাইছিল যে দুয়োটা শিবিৰৰ মাজত সম্পৰ্ক ইমানেই বেয়া হৈছিল যে তেওঁৰ পিতৃয়ে পাটিলৰ বিৰুদ্ধে আৰক্ষীৰ ওচৰত অভিযোগো দাখিল কৰিছিল।
প্ৰথম অৱস্থাত আৰক্ষীৰ তদন্তত সন্তুষ্ট নহৈ নিম্বালকাৰৰ পৰিয়ালে এক নিৰপেক্ষ তদন্ত বিচাৰি বোম্বে উচ্চ ন্যায়ালয়ৰ কাষ চাপিছিল। ন্যায়ালয়ৰ হস্তক্ষেপৰ পিছত এই গোচৰৰ তদন্ত কেন্দ্ৰীয় অপৰাধ অনুসন্ধান ব্যুৰো চমুকৈ চি বি আইক অৰ্পণ কৰা হৈছিল। ২০০৯ চনত চি বি আয়ে দাখিল কৰা অভিযোগনামাত পদমসিং পাটিলক এই হত্যাৰ মূল অভিযুক্ত আৰু ষড়যন্ত্ৰকাৰী হিচাপে উল্লেখ কৰিছিল। চি বি আইৰ মতে, ৰাজনৈতিক শত্ৰুতাৰ বাবেই এই ষড়যন্ত্ৰ ৰচনা কৰা হৈছিল। তদন্তকাৰী বিষয়াসকলে অভিযোগ কৰিছিল যে পাটিলে বিশ্বাস কৰিছিল নিম্বালকাৰৰ বৰ্ধিত জনপ্ৰিয়তাই ওচমানাবাদ জিলাত তেওঁৰ ৰাজনৈতিক প্ৰভাৱৰ প্ৰতি ভাবুকি কঢ়িয়াই আনিছে। সেয়েহে নিম্বালকাৰক হত্যা কৰিবলৈ ৩০ লাখ টকাৰ এক চুক্তি কৰা হৈছিল। লগতে তেৰ্ণা চেনী কলৰ পৰিচালনাক লৈ হোৱা বিবাদো এই হত্যাৰ অন্যতম কাৰণ আছিল বুলি চি বি আয়ে উল্লেখ কৰিছিল। অৱশ্যে পাটিলে এই অভিযোগ ধাৰাবাহিকভাৱে অস্বীকাৰ কৰি আহিছিল আৰু অৱশেষত আদালতে সকলো অভিযুক্তক এই গোচৰৰ পৰা মুকলি কৰি দিয়ে।
