“আজিৰ সাংবাদিকসকলে ত্যাগ স্বীকাৰ কৰিবলৈ শিকিব লাগিব তেতিয়াহে প্ৰকৃত সংবাদ সেৱা সম্ভৱ হ’ব৷ কঠোৰ পৰিশ্ৰম, সাধনা আৰু ত্যাগৰ দ্বাৰাহে আমি প্ৰকৃত সংবাদ সেৱা লাভ কৰিব পাৰিম৷ সাম্প্ৰতিক সময়ত অতি সহজ, দ্ৰুত আৰু লেকাম নথকা সাংবাদিকতাই জনগণৰ মাজত, সমাজত আন এক বিশৃংখলতাৰ সৃষ্টি কৰিব৷” কোভিড সৃষ্ট পৰিৱেশ-পৰিস্থিতিৰ বাবে স্থগিত ৰখা দিছপুৰ প্ৰেছ ক্লাবৰ বঁটা প্ৰদান কাৰ্যসূচীত মুখ্য অতিথি হিচাপে অংশগ্ৰহণ কৰি এই মন্তব্য আগবঢ়ায় ডেকাই৷
ৰাজ্যৰ বিভিন্ন ক্ষেত্ৰলৈ উল্লেখনীয় অৱদান আগবঢ়োৱা ১৪ গৰাকী বিশিষ্ট ব্যক্তিক বিভিন্ন শিতানৰ বাবে বঁটা প্ৰদান কৰে প্ৰবীণ সাংবাদিক ডেকাই।
অসম তথা উত্তৰ-পূৰ্বাঞ্চলৰ প্ৰথমগৰাকী মহিলা সম্পাদকৰ গুৰু দায়িত্ব বহন কৰি সংবাদক্ষেত্ৰখনলৈ উল্লেখনীয় অৱদান আগবঢ়োৱা বাবে সাদিন কাকতৰ সম্পাদক তথা বিশিষ্ট সাহিত্যিক অনুৰাধা শৰ্মা পূজাৰীক ‘সম্পাদক বঁটা-২০২০ প্ৰদান কৰা হয়৷ বঁটা গ্ৰহণ কৰি শৰ্মা বৰপূজাৰীয়ে দিছপুৰ প্ৰেছ ক্লাবে মহিলা সম্পাদক এগৰাকীক সম্পাদক বঁটা প্ৰদান কৰাৰ বাবে কৃতজ্ঞতা প্ৰকাশ কৰে৷
একেদৰে সাংবাদিক আৰু সংবাদ মাধ্যমৰ সৈতে আৰক্ষীৰ সম্পৰ্ক মধুৰ কৰি তোলাৰ ক্ষেত্ৰত বিশেষ ভূমিকা পালন কৰা তথা অসম আৰক্ষীৰ বিভিন্ন বা-বাতৰি যোগান ধৰাৰ ক্ষেত্ৰত সক্ৰিয় ভূমিকা পালন কৰি অহা বাবে অসম আৰক্ষীৰ মুখ্য জনসম্পৰ্কৰক্ষী বিষয়া ৰাজীৱ শইকীয়াক ‘সংবাদ বান্ধৱ বঁটা-২০২০’, সাংবাদিকৰ বিভিন্ন কল্যাণকামী আঁচনি ৰূপায়ণৰ ক্ষেত্ৰত এক অগ্ৰণী ভূমিকা পালন কৰি অহা তথা সাংবাদিক সংগঠনসমূহক ঐক্যৱদ্ধ কৰি ৰখাত গুৰুত্বপূৰ্ণ ভূমিকা পালন কৰি অহা বাবে দ্য ছেণ্টিনেল কাকতৰ জ্যেষ্ঠ সাংবাদিক মৌচম জ্যোতি বৈশ্যক ‘সাংবাদিক সংগঠক, কল্যাণ বঁটা – ২০২০’ৰ বাবে নিৰ্বাচিত কৰিছে দিছপুৰ প্ৰেছ ক্লাবে৷
একেদৰে টেলিভিছনৰ নিউজ এংকৰ আৰু প্ৰযোজিকা হিচাপে বিদ্যুতিন সংবাদ মাধ্যমলৈ উল্লেখনীয় অৱদান আগবঢ়োৱা নিউজ-১৮ অসম নৰ্থ ইষ্টৰ ইভা মহন্তক ‘নিউজ এংকৰ বঁটা-২০২০’, অসমৰ কাৰিকৰী শিক্ষাত যুগান্তকাৰী পৰিৱৰ্তন আনিবলৈ সক্ষম হোৱা বাবে কাৰিকৰী শিক্ষাৰ গৱেষক তথা কাৰিকৰী শিক্ষা বিভাগ অসমৰ সঞ্চালক ড॰ অতুল বৰাক ‘জ্ঞানজ্যোতি বঁটা – ২০২০’, নিষ্ঠা-সততা আৰু দক্ষতাৰে অসম আৰক্ষীৰ গৃহ নিৰ্মাণ পৰিষদক এক নতুন মাত্ৰা প্ৰদান কৰা তথা আৰক্ষী আৰু জনসাধাৰণৰ মাজত সু-সম্পৰ্ক গঢ়ি তোলাত বিশেষ ভূমিকা পালন কৰি অহা বাবে অসম আৰক্ষী গৃহ নিৰ্মাণ পৰিষদৰ পৰিচালন সঞ্চালক অৰবিন্দ কলিতাক ‘জনহিতৈষী আৰক্ষী বঁটা-২০২০’, সমাজত শান্তি-শৃংখলা, সম্প্ৰীতি, মানৱতা অটুত ৰখাৰ স্বাৰ্থত ৰাইজৰ মনত থকা অন্ধবিশ্বাস দূৰীকৰণ কৰি ডাইনী প্ৰথাৰ বিৰুদ্ধে যুঁজ অব্যাহত ৰখা মানৱাধিকাৰ তথা সমাজকৰ্মী ড॰ দিব্যজ্যোতি শইকীয়াক ‘মানৱতা বঁটা-২০২০’, বঁটা প্ৰদান কৰা হয়৷
মানৱতাৰ দৃষ্টিৰে বিশেষ ৰেহাই হাৰত দুখীয়া ৰোগীক চিকিৎসা সেৱা প্ৰদানৰ ক্ষেত্ৰত বিশেষ অৱদান আগবঢ়োৱা বাবে তথা সকলোৰে বাবে স্বাস্থ্য শীৰ্ষক নীতিক সাৰোগত কৰি বিভিন্ন ৰোগৰ নতুন চিকিৎসা পদ্ধতি উদ্ভাৱনত গুৰুত্ব প্ৰদান কৰি অহা নেমকেয়াৰ হাস্পতালৰ স্বত্তাধিকাৰ, বিশিষ্ট চিকিৎসক ডাঃ হিতেশ বৰুৱাক ‘জীৱন সঞ্জীৱনী বঁটা-২০২০’, অসম অলিম্পিক সন্থাৰ সম্পাদক তথা ক্ৰীড়া আৰু যুৱ কল্যাণ পৰিষদৰ সদস্য সচিব লক্ষ্য কোঁৱৰক ‘যুৱ ৰাজনৈতিক বঁটা-২০২০’ প্ৰদান কৰে দিছপুৰ প্ৰেছ ক্লাবে।
ভ্ৰাম্যমান থিয়েটাৰ, অসমীয়া চলচিত্ৰ, টিভি ধাৰাবাহিক আদিত অভিনয়ৰে অসমৰ সাংস্কৃতিক জগতখনলৈ উল্লেখনীয় অৱদান আগবঢ়োৱা বাবে অভিনেত্ৰী মুনমী ফুকনক ‘অভিনেত্ৰী বঁটা-২০২০’, ভ্ৰাম্যমান থিয়েটাৰৰ অভিনয় জগতত ভূমুকি মাৰিয়েই দৰ্শক ৰাইজৰ বিপুল সমাদৰ লাভ কৰিবলৈ সক্ষম হোৱা হেঙুল থিয়েটাৰৰ অভিনেত্ৰী নিৰ্মালী এছ বৰাক ‘নৱাগতা অভিনেত্ৰী বঁটা-২০২০, সমাজত সংঘটিত ঘটনাৱলিৰ ওপৰত সদা সতৰ্ক দৃষ্টি ৰাখি বলিষ্ঠ ভূমিকা পালন কৰি অহা বাবে বিশিষ্ট সমাজকৰ্মী যুৱনেতা জিতুল ডেকাক ‘জাগ্ৰত যুৱ বঁটা-২০২০ আৰু অসমৰ উগ্ৰপন্থী সমস্যাৰ বিৰুদ্ধে তথা বিভিন্ন জাতীয় সমস্যা সমাধানৰ স্বাৰ্থত সদায় সাহসেৰে বিভিন্ন পদক্ষেপ গ্ৰহণ কৰি অহা বাবে আভিজিৎ শৰ্মাক ‘সাহসী বঁটা-২০২০ প্ৰদান কৰা হয়৷
আজিৰ এই অনুষ্ঠানত নিমন্ত্ৰিত অতিথি হিচাপে উপস্থিত থাকে বিশিষ্ট সাংবাদিক বৈকুণ্ঠনাথ গোস্বামী, জ্যেষ্ঠ সাংবাদিক অমল গুপ্ত আৰু দিছপুৰ প্ৰেছ ক্লাবৰ সভাপতি নৰেন হাজৰিকা৷
