শুকুৰবাৰে ঘোষণা কৰা হৈছে ২০২১ বৰ্ষৰ শান্তিৰ নোবেল বঁটা বিজয়ীৰ নাম।
ফিলিপিনছৰ সাংবাদিক মাৰিয়া ৰেছা আৰু ৰাছিয়াৰ দিমিত্ৰী মুৰাটভক তেওঁলোকৰ দেশত মত প্ৰকাশৰ স্বাধীনতাৰ হকে কৰা যুঁজৰ বাবে এই বৰ্ষৰ শান্তিৰ নবেল বঁটা আগবঢ়োৱা হৈছে।
নৰৱেৰ নবেল কমিটিৰ অধ্যক্ষা বেৰিট ৰেইছ-এণ্ডাৰছেনে কয় যে ৰেছা আৰু মুৰাটভক মত প্ৰকাশৰ স্বাধীনতা সুৰক্ষিত কৰাৰ প্ৰচেষ্টাৰ বাবে সন্মানিত কৰা হৈছে, যিটো গণতন্ত্ৰ আৰু স্থায়ী শান্তিৰ বাবে এক পূৰ্ব চর্ত।
এণ্ডাৰচনে লগতে কয়, “তেওঁলোক সকলো সাংবাদিকৰ প্ৰতিনিধি যিয়ে পৃথিৱীত গণতন্ত্ৰ আৰু সংবাদ মাধ্যমৰ স্বাধীনতাই ক্ৰমান্বয়ে প্ৰতিকূল পৰিস্থিতিৰ সন্মুখীন হোৱাৰ সময়তে মত প্ৰকাশৰ স্বতন্ত্ৰতাৰ আদৰ্শৰ পক্ষত থিয় দিয়ে।”
২০১২ চনত, ৰেছাই অনুসন্ধানমূলক সাংবাদিকতাৰ বাবে প্ৰতিষ্ঠা কৰা ডিজিটেল মিডিয়া কোম্পানী ৰেপলাৰৰ সহ-প্ৰতিষ্ঠাপক আছিল। তেওঁ এতিয়াও ৰেপলাৰৰ মুৰব্বী হিচাপে কাৰ্যনিৰ্বাহ কৰি আছে।
ৰেপলাৰে ফিলিপিনছৰ ৰাষ্ট্ৰপতি দুতেৰ্তেৰ শাসনৰ বিতৰ্কিত আৰু হত্যাকাৰী ড্ৰাগবিৰোধী অভিযানৰ ওপৰত সমালোচনামূলক দৃষ্টিভংগীৰে কাম কৰি আছে।
আনহাতে নোবেল বিজয়ী আনগৰাকী ব্যক্তি মুৰাটভে ক্ৰমান্বয়ে প্ৰত্যাহ্বানজনক পৰিস্থিতিলৈ গতি কৰা ৰাছিয়াত কেইবা দশক ধৰি বাক স্বাধীনতা ৰক্ষা কৰি আহিছে।
১৯৯৩ চনত তেওঁ স্বতন্ত্ৰ বাতৰি কাকত নোভায়া গাজেটাৰ অন্যতম প্ৰতিষ্ঠাপক আছিল। এই কাকতখনে ক্ষমতাৰ প্ৰতি মৌলিকভাৱে সমালোচনামূলক মনোভাৱ গ্ৰহণ কৰি আহিছে। মুৰাটভ ১৯৯৫ চনৰ পৰা এই কাকতৰ মুখ্য সম্পাদক হৈ আছে।
“মত প্ৰকাশৰ স্বাধীনতা আৰু সংবাদ মাধ্যমৰ স্বাধীনতা অবিহনে বৰ্তমান ৰাষ্ট্ৰসমূহৰ মাজত ভ্ৰাতৃত্ব, নিৰস্ত্ৰীকৰণ আৰু এক উন্নত বিশ্ব ব্যৱস্থাৰ সফল প্ৰচাৰ কৰাটো কঠিন হ’ব।” ৰেইছ-এণ্ডাৰচনে কয়।
