বহু বাক-বিতণ্ডা, প্ৰতিবাদৰ অন্তত অহা ৯ নৱেম্বৰৰ পৰা ২০ নৱেম্বৰলৈ গুৱাহাটীৰ চানমাৰিস্থিত অসম অভিযান্ত্ৰিক প্ৰতিষ্ঠান খেলপথাৰত অনুষ্ঠিত হ’ব ২০ সংখ্যক উত্তৰ-পূব গ্ৰন্থমেলা।
গ্ৰন্থমেলাখনৰ বাবে অসম পুথি প্ৰকাশক আৰু বিক্ৰেতা সন্থাই ইতিমধ্যে প্ৰস্তুতি প্ৰায় সম্পূৰ্ণ কৰি তোলা বুলি সন্থাৰ সাধাৰণ সম্পাদক ধীৰাজ গোস্বামীয়ে জানিবলৈ দিয়ে।
আজি সাংবাদিকৰে হোৱা বাৰ্তালাপত গোস্বামীয়ে কয় যে অহা ৯ নৱেম্বৰৰ বিয়লি তিনি বজাত বিশিষ্ট সাহিত্যিক য়েছে দৰজে ঠংছিয়ে গ্ৰন্থমেলাখনৰ শুভ উদ্বোধন কৰিব। এই অনুষ্ঠানত মুখ্য মন্ত্ৰী সৰ্বানন্দ সোণোৱাল প্ৰমুখ্যে ভালেসংখ্যক বিশিষ্ট ব্যক্তি উপস্থিত থাকিব বুলিও উল্লেখ কৰে।
উদ্যোক্তা সকলে জানিবলৈ দিয়া মতে এইবাৰৰ উত্তৰ-পূৱ গ্ৰন্থমেলাত মুঠ ২৫০ খন বিপনী থাকিব। অসম তথা উত্তৰ-পূৰ্বাঞ্চলৰ প্ৰায় প্ৰতিটো সৰু-বৰ প্ৰকাশন গোষ্ঠীয়ে এই গ্ৰন্থমেলাত অংশ গ্ৰহণ কৰিব বুলি জানিবলৈ দিয়ে। ইয়াৰ লগতে দিল্লী, মুম্বাই, গুজৰাটৰ লগতে ভাৰতৰ বিভিন্ন ৰাজ্যৰ বহুকেইটা আন্তঃৰাষ্ট্ৰীয় মানসম্পন্ন প্ৰকাশন গোষ্ঠীয়ে ভাগ লোৱাৰ উপৰিও বাংলাদেশৰ পৰা তিনিটা প্ৰকাশন গোষ্ঠীয়ে অংশ ল’ব বুলি জানিবলৈ দিয়ে।
মঙলবাৰে গুৱাহাটী প্ৰেছ ক্লাৱত লটাৰী অনুষ্ঠিত কৰি অসম পুথি প্ৰকাশক আৰু বিক্ৰেতা সংস্থাই বিপনীৰ বাবে আবেদন কৰা প্ৰকাশক তথা ব্যৱসায়িক গোষ্ঠী সমুহক বিপনী সমুহ আৱন্টন দিয়ে।
ইপিনে, প্ৰথম অৱস্থাত এই গ্ৰন্থমেলাখনক লৈ সৃষ্টি হোৱা অচলাৱস্থা দূৰ হোৱা বুলি উল্লেখ কৰি উদ্যোক্তাসকলৰ হৈ ধীৰাজ গোস্বামীয়ে এইক্ষেত্ৰত আগভাগ তথা সহযোগিতা গ্ৰহণ কৰাৰ বাবে মুখ্য মন্ত্ৰী, শিক্ষা মন্ত্ৰীৰ লগতে বিশিষ্ট ব্যক্তি আৰু সংবাদ মাধ্যমলৈ ধন্যবাদ জ্ঞাপন কৰে। তেওঁ লগতে এই গ্ৰন্থমেলাত অসম প্ৰকাশন পৰিষদেও অংশগ্ৰহণ কৰিব বুলি জানিবলৈ দিয়ে।
আজি গুৱাহাটী প্ৰেছ ক্লাৱত গ্ৰন্থমেলাৰ বিপনী আৱন্টনৰ বাবে আয়োজিত লটাৰীৰ সময়ত উপস্থিত থাকি গ্ৰন্থমেলাখনৰ ৰাজহুৱা উপদেষ্টা সমিতিৰ সদস্য বিমল কুমাৰ হাজৰিকাই কয়, ‘’উত্তৰ-পূব গ্ৰন্থমেলাই এক ৰাজহুৱা অনুষ্ঠানৰ ৰূপ লৈছে। গুৱাহাটীৰ লগতে অসমৰ বিভিন্ন প্ৰান্তৰ সকলো শ্ৰেণীৰ লোকেই ইয়াক আদৰি লৈছে।‘’
অনুষ্ঠানটোত উপস্থিত থাকি ৰাজহুৱা উপদেষ্টা সমিতিৰ আন এগৰাকী সদস্য জ্যেষ্ঠ অধিবক্তা সত্যেন্দ্ৰ প্ৰসাদ ডেকাই এই গ্ৰন্থমেলাই বৰ্তমান সময়ত অসমত সৃষ্টি হোৱা পৰিস্থিতিৰ বিপৰীতে সমন্বয়ৰ সেঁতু গঢ়িব বুলি মন্তব্য কৰে।
অনুষ্ঠানত ৰাজহুৱা উপদেষ্টা সমিতিৰ সদস্য অধিবক্তা বিষ্ণু প্ৰসাদ কুমাৰ আৰু কে চি দাস বাণিজ্য মহাবিদ্যালয়ৰ অধ্যক্ষ ড০ ঘনশ্যাম নাথেও অংশ লয়।
