২০০৭ চনত অন্ধ্ৰ প্ৰদেশৰ আল্লুৰি সীতাৰামা ৰাজু জিলাত ২১ গৰাকী আৰক্ষীৰ বিৰুদ্ধে জিলাখনৰ এখন গাঁৱত ১১ গৰাকী কন্ধ জনজাতীয় মহিলাক দলবদ্ধ ধৰ্ষণ কৰাৰ অভিযোগ উত্থাপন হৈছিল। ১৬ বছৰ পিছত এতিয়া অভিযুক্ত ২১ গৰাকী আৰক্ষীক দোষমুক্ত ঘোষণা কৰিছে জিলাখনৰ বিশেষ আদালতে।
এই গোচৰৰ তদন্তৰ বাবে নিয়োজিত তদন্তকাৰী বিষয়া দুগৰাকীয়ে ন্যায্য আৰু নিৰপেক্ষ তদন্ত চলাব নোৱাৰাৰ বাবেই মূলতঃ অভিযুক্ত আৰক্ষী কেইগৰাকীক দোষমুক্ত কৰা হৈছে বুলি আদালতে ৰায় দিয়ে। ২০১৮ চনত বিশাখাপট্টনমত আৰম্ভ হৈছিল এই গোচৰৰ বিচাৰ প্ৰক্ৰিয়া।
বৃহস্পতিবাৰে SC & ST (Prevention of Atrocities) Act ৰ অধীনত একাদশ অতিৰিক্ত জিলা আৰু অধিবেশন ন্যায়াধীশ-সহ-বিশেষ আদালতে দুৰ্ণীতিগ্ৰস্ত তদন্তৰ বাবে আৰক্ষীক দোষমুক্ত কৰে। আদালতে লগতে ধৰ্ষণৰ বলি হোৱা মহিলাসকলক জিলা আইন সেৱা প্ৰাধিকৰণৰ জৰিয়তে ক্ষতিপূৰণ দিবলৈ নিৰ্দেশ দিয়ে।
উল্লেখ্য যে, ২০০৭ চনৰ ২০ আগষ্টত ২১ জনীয়া গ্ৰেহাউণ্ডছ নামৰ বিশেষ আৰক্ষী দল এটাই এক অভিযানৰ বাবে বাকাপল্লী নামৰ গাঁওখনত বিশেষভাৱে দুৰ্বল জনজাতীয় গোটৰ অন্তৰ্গত ১১ গৰাকী জনজাতীয় মহিলাক যৌন নিৰ্যাতন চলোৱাৰ অভিযোগ উত্থাপন হৈছিল।
ৰাজ্যখনৰ মানৱ অধিকাৰ মঞ্চৰ এগৰাকী সদস্যৰ মতে, অভিযুক্ত আৰক্ষীকেইগৰাকীৰ বিৰুদ্ধে অভিযোগ দাখিল কৰা হৈছিল যদিও এগৰাকী অভিযুক্তকো গ্ৰেপ্তাৰ কৰা হোৱা নাছিল। ইয়াৰে কেইগৰাকীমান জোৱানে অৱসৰ গ্ৰহণ কৰাৰ বিপৰীতে কেইবাগৰাকীমানৰ ইতিমধ্যে মৃত্যু হৈছে।
মানৱ অধিকাৰ মঞ্চখনৰ মতে, অভিযুক্ত আৰক্ষী কেইগৰাকীৰ বিৰুদ্ধে তদন্ত আৰম্ভ হৈছিল যদিও তদন্তত আপোচ কৰা হৈছিল আৰু ফৰেনছিক চিকিৎসা পৰীক্ষাত দোষী সাব্যস্ত হোৱাৰ সময়ত বাধ্যতামূলক পদ্ধতিক অৱজ্ঞা কৰি অভিযুক্তক সুৰক্ষা দিয়াৰ উদ্দেশ্যেৰে তদন্ত কৰা হৈছিল।
মঞ্চই লগতে বাকাপল্লী ধৰ্ষণৰ বলি হোৱা মহিলাসকলক ক্ষতিপূৰণ দিবলৈ আদালতে দিয়া নিৰ্দেশৰ দ্বাৰা আদালতে যে ভুক্তভোগী মহিলাসকলৰ জবানবন্দীৰ ওপৰত বিশ্বাস ৰাখিছিল সেয়া স্পষ্ট কৰিছে বুলিও দাবী কৰে।
