আজি ১১ জানুৱাৰি শুকুৰবাৰে ধেমাজি জিলাৰ জোনাই মহকুমাৰ নিৰ্বাচনৰ বাবে ১৭খন মিচিং স্বায়ত্ত শাসিত পৰিষদ আৰু ৪খন সোণোৱাল কচাৰী স্বায়ত্ত শাসিত পৰিষদৰ মুঠ ২১গৰাকী প্ৰাৰ্থীয়ে মনোনয়নপত্ৰ জমা দিয়ে। মিচিং স্বায়ত্ত শাসিত পৰিষদৰ ৬নং ছানজোৰি নিগিৰ (জনজাতি)সমষ্টিৰ বাবে সন্মিলিত গণশক্তিৰ মালেন্দ্ৰ নাৰ্জাৰীৰে মনোনয়নপত্ৰ জমা দিছে।
পূৰ্বৰ মিচিং স্বায়ত্ত শাসিত পৰিষদৰ কাৰ্যবাহী পাৰিষদ ৰাজু মেদকেও এইখন আসনত প্ৰতিদ্বন্দ্বিতা কৰিছে। তেওঁ ইয়াৰ আগতে এছজিএছৰ হৈ ৩ নং গালি-বিজয়পুৰ (এছটি) সমষ্টিৰ পৰা প্ৰতিদ্বন্দ্বিতা আগবঢ়াইছিল। আনহাতে মিচিং ছাত্ৰৰ (টিএমপিকে) কেন্দ্ৰীয় সমিতিৰ সভাপতি নৰেশ কুমবাঙে ২নং মুৰ্কংছেলেক (অসংৰক্ষিত) আসনখনত প্ৰতিদ্বন্দ্বিতা কৰিছে। আছুৰ প্ৰাক্তন সাহিত্য বিভাগৰ সম্পাদক আৰ্নল্ড টায়েই আইএনচিৰ মহাবীৰ পায়েঙেও এই একেই সমষ্টিত প্ৰতিদ্বন্দ্বিতা আগবঢ়াব।
আনহাতে বিজয় শইকীয়া (বিজেপি), জান হাজৰিকা (আইএনচি) আৰু ২গৰাকী নিৰ্দলীয় প্ৰাৰ্থী হৰ্ষজ্যোতি কচাৰী আৰু ৰাজেন সোণোলালে জোনাইৰ একমাত্ৰ সোণোৱাল কচাৰী স্বায়ত্ত শাসিত পৰিষদৰ আসনখনত প্ৰতিদ্বন্দ্বিতা কৰিছে।
নিৰ্বাচন বিভাগে ধেমাজি মহকুমাত ৩৫খন মনোনয়নপত্ৰ লাভ কৰিছে। ইয়াৰে ১০খন মিচিং স্বায়ত্ত শাসিত পৰিষদ আৰু ৩খন সোণোৱাল কচাৰী স্বায়ত্ত শাসিত পৰিষদৰ বিপৰীতে ১১খনকৈ মনোনয়নপত্ৰ লাভ কৰিছে।
দুয়োটা স্বায়ত্ত শাসিত পৰিষদৰ বাবে মনোনয়নপত্ৰসমূহৰ অহা ১২ জানুৱাৰিত পুনৰীক্ষণ কৰা হ’ব আৰু মনোনয়নপত্ৰ প্ৰত্যাহাৰৰ অন্তিম তাৰিখ ১৪ জানুৱাৰি ধাৰ্য কৰা হৈছে। উল্লেখ্য যে নিৰ্বাচন আয়োগে ২১ জানুৱাৰিত দুয়োটা স্বায়ত্ত শাসিত পৰিষদৰ নিৰ্বাচনৰ দিন স্থিৰ কৰিছে। উল্লেখ্য যে ধেমাজি জিলাত ৰাভা হাছং স্বায়ত্ত শাসিত পৰিষদৰ বাবে কোনো সুকীয়া সমষ্টি নাই।