মণিপুৰৰ উখৰুল জিলাৰ পৰা অপহৃত হোৱা ২১ জন তাংখুল নাগা যুৱকক অৱশেষত সুৰক্ষিতভাৱে মুক্তি দিয়া হৈছে। যোৱা বুধবাৰে অপহৰণ হোৱাৰ এদিন পিছত অৰ্থাৎ বৃহস্পতিবাৰে পুৱতি নিশা তেওঁলোকক মুকলি কৰি দিয়া বুলি প্ৰশাসনিক সূত্ৰই জনাইছে।
ৰাজ্য চৰকাৰৰ উচ্চপদস্থ বিষয়া আৰু নাগা তথা কুকি-জো সম্প্ৰদায়ৰ বিভিন্ন নাগৰিক সংগঠনৰ নেতৃবৃন্দৰ মাজত হোৱা দীঘলীয়া আলোচনাৰ অন্তত তেওঁলোকক মুক্তি দিয়া হৈছে। মুকলি কৰি দিয়াৰ পিছত যুৱকসকলক লিটান আৰক্ষী থানালৈ লৈ যোৱা হয় আৰু তাৰ পৰাই তেওঁলোক নিজ নিজ পৰিয়ালৰ ওচৰলৈ উভতি যায়।
আৰক্ষীৰ পৰা জানিব পৰা মতে বুধবাৰে দুপৰীয়া উখৰুল-ইম্ফল পথেৰে তিনিখন গাড়ীত গৈ থকা অৱস্থাত উখৰুল জিলাৰ কুকি অধ্যুষিত শাংখাই গাঁৱত এক সশস্ত্ৰ দল আৰু একাংশ লোকে যুৱকসকলক আৱদ্ধ কৰি ৰাখিছিল। ইয়াৰ পিছতে তেওঁলোকক অপহৰণ কৰা হয়। এই ঘটনাক লৈ তাংখুল নাগা সম্প্ৰদায়ৰ শীৰ্ষ সংগঠন তাংখুল নাগা লং-এ তীব্ৰ প্ৰতিক্ৰিয়া প্ৰকাশ কৰিছিল। তেওঁলোকে অভিযোগ কৰিছিল যে কুকি উগ্ৰপন্থীয়ে এই কাৰ্য সংঘটিত কৰিছে আৰু ইয়াক নাগাসকলৰ বিৰুদ্ধে এক পৰিকল্পিত হিংসা বুলি অভিহিত কৰিছিল। লগতে কেন্দ্ৰ আৰু ৰাজ্য চৰকাৰক অতি কম সময়ৰ ভিতৰত যুৱকসকলক উদ্ধাৰ কৰিবলৈ দাবী জনাইছিল।
ইফালে শাংখাই গাঁৱৰ কুকি কৰ্তৃপক্ষই এক বিপৰীত দাবীহে উত্থাপন কৰিছে। তেওঁলোকৰ মতে কিছুসংখ্যক তাংখুল নাগা স্বেচ্ছাসেৱকে প্ৰথমে থোৱাই কুকি গাঁৱৰ খেতিয়কৰ ওপৰত গুলীবৰ্ষণ কৰিছিল আৰু কেইবাটাও পজাত জুই লগাই দিছিল। সেই ঘটনাত এজন গাঁৱবাসী গুলীবিদ্ধ হৈ চিকিৎসালয়ত ভৰ্তি হ’বলগীয়া হোৱাৰ লগতে পানীৰ পাইপ মেৰামতি কৰিবলৈ যোৱা দুজন শ্ৰমিকো নিখোঁজ হোৱা বুলি তেওঁলোকে অভিযোগ কৰিছে। এই উত্তপ্ত পৰিস্থিতিৰ মাজতে পথ অৱৰোধৰ দৰে কাৰ্যসূচীও গ্ৰহণ কৰা হৈছিল যদিও আলোচনাৰ অন্তত ২১ জন যুৱকক মুকলি কৰি দিয়াত অঞ্চলটোত উত্তেজনা কিছু শাম কাটিছে।
