শিক্ষাৰ ক্ষেত্ৰখনলৈ আগবঢ়োৱা অনন্য অৱদানৰ বাবে বুকলেণ্ডৰ তৰফৰ পৰা আজি শ্ৰীমন্ত শংকৰ একাডেমীৰ অধ্যক্ষা ড০ গীতা দত্ত বৰুৱাক শ্ৰেষ্ঠ শিক্ষকৰ বঁটা প্ৰদান কৰা হয়।
এই সন্দৰ্ভত বুকলেণ্ডৰ পৰামৰ্শদাতা উজ্জ্বল বৰাই নৰ্থ ইষ্ট নাওক কয় যে শিক্ষাৰ ক্ষেত্ৰখনলৈ আগবঢ়োৱা অৱদানৰ বাবে ড০ গীতা দত্ত বৰুৱাক এই বঁটা প্ৰদান কৰা হৈছে । উল্লেখযোগ্য যে ইতিমধ্যে যোৱা দেওবাৰে অনুষ্ঠিত হৈ যোৱা বুকলেণ্ড শ্ৰেষ্ঠ শিক্ষকৰ বঁটা প্ৰদান অনুষ্ঠানত মুঠ পাঁচগৰাকী শিক্ষকক এই বঁটা প্ৰদান কৰা হৈছে।
প্ৰসংগক্ৰমে উল্লেখযোগ্য যে গুৱাহাটীৰ অন্যতম শিক্ষা প্ৰতিষ্ঠান শ্ৰীমন্ত শংকৰ একাডেমীৰ অধ্যক্ষা ড০ গীতা দত্ত বৰুৱাকো এই বঁটা প্ৰদান অনুষ্ঠানত বঁটা গ্ৰহণ কৰাৰ বাবে আমন্ত্ৰণ জনোৱা হৈছিল যদিও তেওঁৰ বিদ্যালয়তে নীট (NEET) পৰীক্ষাৰ দায়িত্বত থকাৰ বাবে তেওঁ সেই অনুষ্ঠানত উপস্থিত থাকিব নোৱাৰিলে।
সেয়েহে আজি বুকলেণ্ডৰ পৰামৰ্শদাতা উজ্জ্বল বৰাৰ নেতৃত্বত এটা দল বিদ্যালয়খনত উপস্থিত হৈ অধ্যক্ষাগৰাকীক এই বঁটা প্ৰদান কৰে।
বঁটা গ্ৰহণ কৰি বিদ্যালয়খনৰ অধ্যক্ষা ড০ বৰুৱাই নৰ্থ ইষ্ট নাওক কয়— ‘শ্ৰীমন্ত শংকৰ একাডেমীৰ ছাত্ৰ-ছাত্ৰীৰ পৰীক্ষাৰ ফলাফল, সুন্দৰ ব্যৱহাৰ, সুদক্ষ প্ৰশাসন আৰু নিয়মানুৱৰ্তিতাৰ বাবে তেওঁৰ নামটো বুকলেণ্ডে নিৰ্বাচিত কৰিছে। লগতে তেওঁ উক্ত বঁটা বিতৰণী অনুষ্ঠানত ‘নীট’ৰ পৰীক্ষাৰ বাবে উপস্থিত থাকিব নোৱাৰাৰ বাবে দুখ প্ৰকাশ কৰাৰ লগতে বুকলেণ্ড কৰ্তৃপক্ষক তেওঁক এই বঁটাৰ বাবে নিৰ্বাচিত কৰাৰ বাবে কৃতজ্ঞতা জ্ঞাপন কৰে।তদুপৰি বুকলেণ্ডৰ এই প্ৰচেষ্টাই শৈক্ষিক মহলত এক জাগৰণৰ সৃষ্টি কৰিব বুলি প্ৰকাশ কৰে অধ্যক্ষাগৰকীয়ে।‘
আনহাতে বঁটা প্ৰদান কৰা বুকলেণ্ডৰ পৰামৰ্শদাতা উজ্জ্বল বৰুৱাই নৰ্থ ইষ্ট নাওক কয় যে তেওঁলোকে গুৱাহাটীৰ কেইখনমান বিদ্যালয় নিৰ্বাচিত কৰি এক ক্ষেত্ৰভিতিতিক অধ্যয়ন চলাইছিল আৰু তাৰ ভিতৰত শ্ৰীমন্ত শংকৰ একাডেমীয়ে উচ্চ স্থান লাভ কৰিবলৈ সক্ষম হৈছিল। সেই হিচাপে আজি বিদ্যালয়ৰ অধ্যক্ষাগৰাকীক সম্বৰ্ধনা জ্ঞাপন কৰা হয়। বৰ্তমান এই পদক্ষেপে সমগ্ৰ অসমক সামৰি লৈছে যদিও পৰৱৰ্তী পৰ্যায়ত সমগ্ৰ উত্তৰ-পূৰ্বাঞ্চলকো সামৰি ল’ব বুলি তেওঁ আশা প্ৰকাশ কৰে।
