প্ৰথমবাৰৰ বাবে কল্পবিজ্ঞানৰ ভিত্তিত এখন অসমীয়া চলচ্চিত্ৰ নিৰ্মাণৰ বাবে আগবাঢ়ি আহিছে এগৰাকী অসমীয়া যুৱ পৰিচালক। নাম তেওঁৰ অৰিন্দম শৰ্মা।
কাজিৰঙা বিশ্ববিদ্যালয়ৰ পৰা স্নাতক ডিগ্ৰী গ্ৰহণ কৰা অৰিন্দমে এই নতুন পৰিকল্পনাৰ বিষয়ে সদৰী কৰি কয়— ‘অসমত কল্পবিজ্ঞানৰ ভিত্তিত নিৰ্মাণ হ’বলগীয়া এইখনেই হ’ব প্ৰথমখন চলচ্চিত্ৰ।চলচ্চিত্ৰখনৰ কাহিনী, চিত্ৰনাট্য, সংলাপ মই নিজে লিখিছো আৰু পৰিচালনা, সম্পাদনাৰ কামো কৰিম।যোৰহাটৰ কৃষ্ণা ক্ৰাফট প্ৰডাকশ্যনৰ বেনাৰত নিৰ্মাণ হ’বলগীয়া এই চলচ্চিত্ৰখনৰ নাম হ’ব ‘অদভিত্য’।
উল্লেখযোগ্য যে এই চলচ্চিত্ৰখনৰ শ্বুটিং চলিত বৰ্ষৰ মে’ মাহৰ শেষৰ ফালে অথবা জুন মাহত আৰম্ভ হ’ব আৰু ২০২০ চনত সমাপ্ত কৰাৰ লক্ষ্য লোৱা হৈছে।
প্ৰাথমিকভাৱে কাজিৰঙা বিশ্ববিদ্যালয়ৰ পৰা স্নাতক ডিগ্ৰী লাভ কৰা অৰিন্দমে পাছত মুম্বাই ফিল্ম একাডেমীৰ পৰা চলচ্চিত্ৰ নিৰ্মাণৰ চাৰ্টিফিকেট পাঠ্যক্ৰম সমাপ্ত কৰিছিল। ‘লাভঃ ইটছ কমপ্লিকেটেড’ শীৰ্ষক চুটি ছবি পৰিচালনাৰ অভিজ্ঞতা থকা অৰিন্দম শৰ্মাই এই কল্পবিজ্ঞান ভিত্তিক চলচ্চিত্ৰখনে হলীউডৰ ছবিৰ সৈতে ফেৰ মাৰিবলৈ সক্ষম হ’ব বুলি আশা প্ৰকাশ কৰিছে।
সেয়েহে চলচ্চিত্ৰখনত সকলো আধুনিক প্ৰযুক্তি ব্যৱহাৰ কৰা হ’ব বুলি প্ৰকাশ কৰিছে যুৱ পৰিচালক গৰাকীয়ে।
চলচ্চিত্ৰখনত চিৰঞ্জীৱ দত্তই নায়ক আৰু নিপন গোস্বামীয়ে খলনায়কৰ ভূমিকা পালন কৰিব বুলি তেওঁ আশাবাদী।