অহা ১৬ মে’ৰ পৰা দেশী-বিদেশী সকলো পৰ্যটকৰ বাবে বন্ধ থাকিব এশিঙীয়া গঁড়ৰ ৰম্যভূমিৰূপে পৰিচিত পবিতৰা অভয়াৰণ্য। চলিত বৰ্ষৰ ৩০ ছেপ্টেম্বৰলৈকে অভয়াৰণ্যখনত বন্ধ থাকিব জীপ ছাফাৰী আৰু হাতী ছাফাৰী।
অভয়াৰণ্যখনৰ বনাঞ্চলিক বিষয়া অশোক কুমাৰ দাসে জনোৱা মতে বাৰিষাৰ আগমনৰ লগে লগে অভয়াৰণ্যখনৰ ভিতৰ ভাগৰ বাট-পথবোৰ বোকাময় হোৱাৰ কাৰণেই জীপ ছাফাৰী আৰু হাতী ছাফাৰী বন্ধ কৰি দিয়া হ’ব।
ইফালে পবিতৰা অভয়াৰণ্য কৰ্তৃপক্ষই জনোৱা মতে বিগত বৰ্ষৰ তুলনাত চলিত বৰ্ষত অভাৱনীয়ভাৱে বৃদ্ধি পাইছে অভয়াৰণ্য দৰ্শন কৰিবলৈ অহা পৰ্যটকৰ সংখ্যা।
পৰিভ্ৰমী পক্ষীৰ বিচৰণভূমি পবিতৰাত বিগত ২০১৬-১৭ বৰ্ষত দেশী পৰ্যটক ২২,৪৪১গৰাকী, বিদেশী পৰ্যটক ৪৩০ গৰাকী আৰু ৮৭৫জন শিক্ষাৰ্থীসকলৰ পৰা প্ৰায় ৪০,৪৫,৬৭৫ টকা আদায় কৰাৰ বিপৰীতে ২০১৬-১৭ বৰ্ষত দেশী পৰ্যটক প্ৰায় ২৫,৮১৫গৰাকী আৰু বিদেশী পৰ্যটক ৫৬১গৰাকীৰ পৰা প্ৰায় ৪৭,৪৫,২৫০ টকা আদায় কৰি বিগত বৰ্ষৰ অভিলেখ ভংগ কৰিবলৈ সক্ষম হৈছে।
মাত্ৰ ১৬ কিলোমিটাৰ অঞ্চল আগুৰি থকা পবিতৰা অভয়াৰণ্যখনত ১০২টা গড়, দুই শতাধিক বনৰীয়া ম’হ, সহস্ৰাধিক বনগাহৰি আৰু কেইবাটাও প্ৰজাতিৰ জীৱ-জন্তু আছে।
আনহাতে, অসম গৌৰৱ এশিঙীয়া গঁড়ৰ লগতে বন্যজন্তুসমূহক আগন্তুক বাৰিষা কালত ৰক্ষণাবেক্ষণ দিবলৈ পবিতৰাৰ বন বিভাগ ইতিমধ্যে সাজু হৈ উঠা বুলি আমাৰ আগত জানিবলৈ দিয়ে।
