আমেৰিকাৰ নিউ মেক্সিকোৰ বগা বালিৰ মৰুভূমিৰ প্ৰায় ৭০০ বৰ্গ কিলোমিটাৰ অঞ্চলজুৰি সিঁচৰিত হৈ থকা শিলাখণ্ডত শেহতীয়াকৈ মানুহৰ প্ৰাচীনতম পদচিহ্নৰ সন্ধান পোৱা গৈছে। গৱেষণাৰ মতে, এই পদচিহ্নসমূহ প্ৰায় ২০,০০০ ৰ পৰা ২৩,০০০ বছৰ পুৰণি। ইতিপূৰ্বে কোনো গৱেষণাতে আমেৰিকা মহাদেশত ইমান আগতে মানুহৰ অস্তিত্বৰ প্ৰমাণ পোৱা হোৱা নাছিল।
এই নতুন আৱিষ্কাৰে আমেৰিকাত মানুহৰ আগমনৰ সময়সীমা আগতকৈ বহুখিনি পিছলৈ লৈ গৈছে। যোৱা এক দশকত আমেৰিকাত মানুহৰ প্ৰথম আৱিৰ্ভাৱক লৈ বহুতো গৱেষণা হৈছে আৰু ভিন্ন মতবাদ উত্থাপন হৈছে। কিন্তু এই পদচিহ্নসমূহে নতুনকৈ ইতিহাস লিখাৰ ইংগিত দিছে। আধুনিক মানুহৰ আৱিৰ্ভাৱ প্ৰায় চাৰে তিনি লাখ বছৰ আগতে আফ্ৰিকাত হৈছিল আৰু তেওঁলোকে ১ লাখৰ পৰা ৬০ হাজাৰ বছৰ আগৰ ভিতৰত আফ্ৰিকাৰ বাহিৰলৈ বিয়পি পৰিবলৈ ধৰিছিল। অৱশ্যে আমেৰিকালৈ মানুহৰ আগমন বহুত পিছতহে হৈছিল বুলি ধৰা হয়।
এটা দশক আগলৈকে বিশ্বাস কৰা হৈছিল যে মাত্ৰ ১৩,০০০ বছৰ আগতেহে আমেৰিকাত মানুহে প্ৰথম খোজ পেলাইছিল। কিন্তু পৰৱৰ্তী সময়ত অৰেগনত ১৪,৪০০ বছৰ, টেক্সাছত ১৫,৫০০ বছৰ আৰু আইডাহোত ১৬,০০০ বছৰ পুৰণি মানুহৰ অস্তিত্বৰ প্ৰমাণ পোৱা গৈছে।
২০১২ চনত আৰিজ’না বিশ্ববিদ্যালয়ৰ প্ৰত্নতাত্ত্বিক ভেন্স হলিডেই হোৱাইট ছেণ্ড মৰুভূমিত গৱেষণা কৰি থকা অৱস্থাত এই পদচিহ্নসমূহ বিচাৰি পাইছিল। এই ছাপবোৰৰ সৈতে কিছুমান গছৰ বীজ আৰু পৰাগ ৰেণুও পোৱা গৈছিল। হলিডেই সেইবোৰৰ ‘ৰেডিঅ’কাৰ্বন ডেটিং‘ কৰাৰ পিছত এই প্ৰত্নতাত্ত্বিক সমল ২০-২৩ হাজাৰ বছৰ পুৰণি বুলি সদৰী কৰে। প্ৰথম অৱস্থাত একাংশ বিশেষজ্ঞই এই তথ্যক লৈ সন্দেহ প্ৰকাশ কৰিছিল যদিও পৰৱৰ্তী সময়ত হলিডেৰ নেতৃত্বত এটা দলে অধিক নিখুঁতভাৱে পৰীক্ষা চলায়। বিভ্ৰান্তি দূৰ কৰিবলৈ নমুনাসমূহ তিনিটা পৃথক পৰীক্ষাগাৰত পৰীক্ষা কৰা হয় আৰু প্ৰতিবাৰেই একেই ফলাফল লাভ কৰে।
প্ৰচলিত মতবাদ অনুসৰি, এচিয়া (বা এছিয়া) আৰু ইউৰেছিয়াৰ পৰা মানুহে বেৰিং সাগৰৰ বৰফৰ প্ৰাকৃতিক সেতু পাৰ হৈ আমেৰিকাত উপস্থিত হৈছিল। প্ৰায় ১১,০০০ ৰ পৰা ২৮,০০০ বছৰ আগতে সাগৰৰ জলপৃষ্ঠ হ্ৰাস পোৱাৰ ফলত এই সেতু নিৰ্মাণ হৈছিল। নিউ মেক্সিকোৰ এই নতুন গৱেষণাই এতিয়া নিশ্চিত কৰিছে যে অন্ততঃ ২৩,০০০ বছৰ আগতেই আমেৰিকা মহাদেশত মানুহৰ বসতি আছিল।
