এটা সাম্প্ৰদায়িক ফেইচবুক পোষ্টক কেন্দ্ৰ কৰি দুটা গোটৰ মাজত হোৱা সংঘাত শাম কটাবলৈ আৰক্ষীয়ে আজি লাঠীচালনা কৰাৰ পিছত ইয়াক হিন্দু লোকৰ ওপৰত প্ৰশাসনৰ বৰ্বৰতা আখ্যা দি কাইলৈ, অৰ্থাৎ ১৫ ছেপ্তেম্বৰত ২৪ ঘণ্টীয়া তিনিচুকীয়া জিলা বন্ধৰ আহ্বান জনাইছে কেইবাটাও হিন্দুত্ববাদী সংগঠনে।
হিন্দু যুৱ ছাত্ৰ পৰিষদ, অসম, বিশ্ব হিন্দু পৰিষদ (তিনিচুকীয়া জিলা), আন্তঃৰাষ্ট্ৰীয় হিন্দু পৰিষদ (অসম), ৰাষ্ট্ৰীয় বজৰং দল (অসম), অসম ঠাকুৰ সংঘ, সদৌ অসম আদিবাসী ছাত্ৰ সন্থা (ডুমডুমা)ই এই বন্ধৰ আহ্বান দিছে বুলি নৰ্থ-ইষ্ট নাওক জানিবলৈ দিছে। ১৫ ছেপ্তেম্বৰৰ পুৱা ৫ বজাৰ পৰা পিছদিনা পুৱা ৫ বজালৈ এই বন্ধ দিয়া হৈছে।
উল্লেখযোগ্য যে এটা সাম্প্ৰদায়িক ঘৃণাজনিত ফেচবুক প’ষ্টক কেন্দ্ৰ কৰি তিনিচুকীয়া জিলাৰ ডুমডুমা আৰক্ষী থানাৰ অন্তৰ্গত বৰহাপজানত আজি দুটা ফৈদৰ মাজত সংঘাতৰ সৃষ্টি হৈছিল। ইয়াক নিয়ন্ত্ৰণ কৰিবলৈ ঘটনাস্থলীত প্ৰশাসনে আৰক্ষী আৰু অৰ্ধসামৰিক বাহিনী মোতায়েন কৰিছিল।
কিন্তু পৰিস্থিতি অধিক অৱনতি ঘটাত আৰক্ষীয়ে লাঠীচালনা কৰাৰ লগতে কন্দুৱা গেছ আৰু শূন্যলৈ গুলীচালনা কৰে। আৰক্ষীৰ লাঠীচালনাত দুয়োটা পক্ষৰ প্ৰায় ২০ জন লোক কিছুপৰিমাণে আহত হয়।