প্রায় ডেৰমাহ ধৰি দেশজুৰি চলি থকা লকডাউনৰ বাবে কৰ্ণাটকত আৱদ্ধ হৈ আছে অসমৰ ২৪গৰাকীকৈ ছাত্ৰ-ছাত্ৰী।
কৰ্ণাটকৰ আমৰুথা আয়ুৰ্বেদা মেডিকেল কলেজত অধ্যয়নৰত অসমৰ এইসকল ছাত্ৰ-ছাত্ৰী।
তেওঁলোকৰ মাজৰে দুগৰাকীয়ে এক ভিডিও যোগে যথেষ্ট অসুবিধাৰ সন্মুখীন হোৱাৰ কথা জানিবলৈ দিছে।
আনকি তেওঁলোকে প্ৰয়োজনীয় সামগ্ৰী, ঔষধ আদি লাভ কৰিবলৈও সক্ষম হোৱা নাই বুলি ভিডিওযোগে অভিযোগ উত্থাপন কৰিছে।
তেওঁলোক থকা জিলাখনৰ উপায়ুক্তৰ কাৰ্যালয়লৈ বাৰম্বাৰ গৈয়ো বৰ্তমানলৈকে কোনো সঁহাৰি লাভ কৰা নাই।
সেয়েহে গৃহ ৰাজ্য অসমলৈ ঘূৰাই অনাৰ ব্যৱস্থা কৰিবলৈ তেওঁলোকে অসম চৰকাৰলৈ কাতৰ অনুৰোধ জনায়।
উল্লেখযোগ্য যে, ৰাজ্য চৰকাৰে যিসকল ছাত্ৰ-ছাত্ৰী অসমৰ বাহিৰৰ দক্ষিণ আৰু পশ্চিম ভাৰতৰ পৰা ঘূৰি আহিব বিচাৰিছে তেওঁলোকক ৫ হাজাৰ টকাকৈ ৰেহাই দিয়া হ’ব বুলি ইতিমধ্যে ঘোষণা কৰিছে।
ঠিক সেইদৰে উত্তৰ ভাৰতৰ পৰা আহিলে ৩ হাজাৰ টকা আৰু পূব ভাৰতৰ পৰা আহিলে ২০০০ টকালৈকে ৰেহাই দিয়া হ’ব।
তেওঁলোকে ১৮০০৩৪৫৩৫২৫ নম্বৰত ফোন কৰি আৰু #assamstudenthelpdeskত জনোৱাৰ পাছত এই ধনৰাশি লাভ কৰিব।
