অসমত পুনৰ ক’ৰনাৰ সংক্ৰমণে উদ্বেগৰ সৃষ্টি কৰিছে। কৰ’নাৰ দ্বিতীয়টো ঢৌ আৰম্ভ হোৱা ৰাজ্যখনত বৃহস্পতিবাৰে নতুনকৈ ২৪৫ গৰাকী লোক কৰ’নাত আক্ৰান্ত হৈছে।
আনহাতে, ৰাজ্যখনত কৰ’নাত এগৰাকী লোকৰ মৃত্যু হৈছে।
বৃহস্পতিবাৰৰ দিনটোত অকল কামৰূপ মহানগৰ জিলাতে কৰ’নাত আক্ৰান্ত হৈছে ১২৮ গৰাকী লোক। সেইদৰে, কামৰূপ গ্ৰাম্য জিলাত ২৮ গৰাকী লোক আক্ৰান্ত হৈছে ।
এই দিনটোত ডিব্ৰুগড়ত ২৬ গৰাকী তিনিচুকীয়াত ১০ গৰাকী; হোজাই জিলাত ৯ গৰকী; শিৱসাগৰ, গোলাঘাট, কৰিমগঞ্জ, বঙাইগাঁৱত ৬ গৰাকীকৈ লোক কৰ’না ভাইৰাছত আক্ৰান্ত হৈছে।
সেইদৰে, কাছাৰ, শোণিতপুৰ, নগাঁও আৰু যোৰহাটত ৫ গৰাকীকৈ লোক আক্ৰান্ত হোৱাৰ লগতে বজালী জিলাত আক্ৰান্ত হৈছে ২গৰাকী লোক।
বৃহস্পতিবাৰে অসমত কৰ’নাৰ দ্বিতীয় ঢৌত মুঠ সক্ৰিয় কৰ’না ৰোগীৰ সংখ্যা ১০২৩ গৰাকীলৈ বৃদ্ধি পাইছে। এই দিনটোত ৬৮গৰাকী লোকক আৰোগ্য লাভ কৰাৰ পাছত হাস্পাতলৰ পৰা যাবলৈ দিয়া হৈছে।
বৃহস্পতিবাৰৰ দিনটোত মুঠ ২২৮৮৮গৰাকী লোকৰ টেষ্ট কৰা হৈছিল আৰু ইয়াৰ ভিতৰত ২৪৫গৰাকীৰ দেহত কোভিড পজিটিভ ধৰা পৰে।
ইপিনে, প্ৰধানমন্ত্ৰী মোডীয়ে বৃহস্পতিবাৰে সম্পূৰ্ণ লকডাউন নহয় বুলি স্পষ্ট কৰিছে।
ৰাজ্যখনৰ স্বাস্থ্য মন্ত্ৰী হিমন্ত বিশ্ব শৰ্মাইও লকডাউন নহয় বুলি ঘোষণা কৰাৰ লগতে ৰঙালী বিহু উদযাপন কৰাৰ ক্ষেত্ৰত সামাজিক দূৰত্ব বিধি মানি চলিবলৈ আহ্বান জনাইছে।
