উত্তৰাখণ্ডৰ হৰিদ্বৰাৰ কুম্ভমেলাত সমাগম হোৱা ভক্ত মাজতে কেৱল কৰোনাৰ সংক্ৰমণ আৱদ্ধ হৈ থকা নাই।
প্ৰায় ২১০০ ৰো অধিক গৰাকী ভক্ত কোভিড সংক্ৰমিত হোৱাৰ পিছতে খবৰ আহিছে যে কুম্ভ মেলাত অংশগ্ৰহণ কৰা ৩০ গৰাকীকৈ সাধুৰ শৰীৰতো কোভিড পিজিটিভ ধৰা পৰিছে।
ইয়াৰ ভিতৰত সৰ্বভাৰতীয় আখড়া পৰিষদৰ নেতা মহন্ত নৰেন্দ্ৰ গিৰিও আছে। ইতিমধ্যে গিৰিক সৰ্বভাৰতীয় আয়ুবিজ্ঞান প্ৰতিষ্ঠান হৃষীকেশ শাখাত চিকিৎসাৰ বাবে ভৰ্তি কৰোৱা হৈছে।
ইফালে মহা নিৰ্ভনী আখড়া পৰিষদৰ নেতা মধ্য প্ৰদেশৰ বিশিষ্ট সাধু স্বামী কপিল দেৱ কোভিড সংক্ৰমণৰ পিছতে ডেহৰাডুনৰ এখন ব্যক্তিগত চিকিৎসালয়ত মৃত্যু হৈছে। উন্নত চিকিৎসাৰ বাবে সাধুগৰাকীক হৰিদ্বৰাৰ পৰা ডেহৰাডুনলৈ স্থান্তাৰিত কৰা হৈছিল।
ইয়াৰ পিছতে নিৰঞ্জন আখড়া পৰিষদৰ ১৩ টাৰো অধিক ধৰ্মীয় গোটৰ কুম্ভ মেলাৰ কাৰ্যসূচী বন্ধ কৰা হৈছে।
“এতিয়ালৈকে ৩০ জন সাধুৰ কোবিড১৯ পৰীক্ষা পজিটিভ পোৱা গৈছে। কোনো নিৰ্দিষ্ট আখড়াত পজিটিভ পোৱা হোৱা নাই। নীৰঞ্জীনী, জুনা আৰু অন্যান্যকে ধৰি প্ৰায় সকলো আখড়াতে পজিটিভ পোৱা গৈছে।” হৰিদ্বাৰ মুখ্য চিকিৎসা বিষয়া ডাঃ এছ কে ঝাই কয়।
“কোভিড-১৯ৰ ফলত অৱনতি হোৱা পৰিস্থিতিৰ প্ৰতি লক্ষ্য ৰাখি কুম্ভ মেলা আমাৰ বাবে বন্ধ কৰা হৈছে… মুখ্য ‘শাহী স্নান’ (ৰাজকীয় স্নান) আমাৰ বাবে সামৰণি মৰা হৈছে আৰু আমাৰ আখড়াৰ বহুতৰে শৰীৰত কৰোনা ভাইৰাছৰ লক্ষণ পোৱা গৈছে।” নিৰঞ্জনী আখড়াৰ সচিব ৰবীন্দ্ৰ পুৰীৰ উদ্ধৃতিৰে সংবাদ সংস্থা এএনআই-এ কয়।
এনআইৰ বাতৰি পৰা মতে যোৱা ১০ এপ্ৰিলৰ পৰা ১৫ এপ্ৰিলৰ ভিতৰত কুম্ভ মেলাত অংশগ্ৰহণ কৰা ২১৬৭ গৰাকী ভক্ত তথা সাধুৰ শৰীৰত কৰোনা ভাইৰাছৰ উপস্থিতিত ধৰা পৰিছে।
