চৰকাৰী খণ্ডৰ বিদ্যালয় সমূহৰ আমূল পৰিবৰ্তনৰ কথা কোৱা সোণোৱাল চৰকাৰৰ হাতত নাই ৩০ হাজাৰ ঠিকাভিত্তিক টে’ট শিক্ষকক দৰমহা দিবলৈ টকা। ৰাজকোষৰ তলি উদং হোৱাৰ বাবেই বৰ্তমানেও মুকলি কৰি দিব পৰা নাই জানুৱাৰি মাহৰ দৰমহা।
দৰমহা নোপোৱাক কেন্দ্ৰ কৰি অসন্তুষ্ট হৈ থকা সদৌ অসম প্ৰাথমিক টে’ট উত্তীৰ্ণ শিক্ষক সমাজে জানিব দিয়া অনুসৰি ৩০ হাজাৰ টে’ট শিক্ষকক দৰমহা প্ৰদান কৰিবলৈ কেন্দ্ৰীয় অংশ ইতিমধ্যে মুকলি কৰি দিয়া হৈছে কিন্তু ৰাজ্য চৰকাৰৰ দৰমহাৰ অংশ এই পৰ্যন্ত মোকলাই দিয়া নাই।
উল্লেখ্য যে কেন্দ্ৰীয় চৰকাৰে নিম্ন প্ৰাথমিক টে’ট শিক্ষকৰ বাবে ১৫ হাজাৰ টকা আৰু উচ্চ প্ৰাথমিকৰ বাবে ২০ হাজাৰ টকা কেন্দ্ৰীয় অংশ হিচাপে প্ৰদান কৰি আহিছে। ইয়াৰ বিপৰীতে ৰাজ্য চৰকাৰে নিম্ন প্ৰাথমিক টে’ট শিক্ষকৰ বাবে ১১ হাজাৰ টকা আৰু উচ্চ প্ৰাথমিকৰ বাবে ৯ হাজাৰ টকা প্ৰদান কৰে।
কিন্তু জানুৱাৰি মাহৰ দৰমহাৰ বাবে ৰাজ্যিক অংশ দৰমহাৰ ধন মোকলাই নিদিয়াৰ ফলতে ৰাজ্যৰ ৩০ হাজাৰ শিক্ষকে এতিয়াও পোৱা নাই দৰমহা। আনহাতে ঠিকাভিত্তিক টে’ট শিক্ষকসকলক সপ্তম দৰমহা আয়োগে নিৰ্ধাৰণ কৰি দিয়া দৰমহাৰ বকেয়া ধনো মোকলাই দিয়া নাই বুলি জানিব পৰা গৈছে।
ৰাজ্য চৰকাৰৰ এনে কাৰ্যত অসন্তুষ্টি প্ৰকাশ কৰি শীঘ্ৰে ঠিকাভিত্তিক শিক্ষকক চাকৰি নিয়মীয়াকৰণ আৰু বেতন সুৰক্ষা প্ৰদান কৰিবলৈ আহ্বান জনায় শিক্ষক সমাজৰ সভাপতি পদ্মলোচন দলে আৰু সম্পাদকদ্বয় মিৰাজুল ৰছিদ, দীপাৰ্ণৱ ঘোষে। ৰাজ্য চৰকাৰে এই সমূহ দাবী পূৰণ নকৰিলে তীব্ৰ গণতান্ত্ৰিক আন্দোলন গঢ়ি তোলাৰো হুংকাৰ প্ৰদান কৰে।
