হোজাই জিলা আৰু কাৰ্বি আংলং জিলাৰ সীমান্তৱৰ্তী লংকাজান দৰ্জিচিট অঞ্চলত কালি নিশা শোকাৱহ ভাৱে মৃত্যু হ’ল দুটাকৈ বনৰীয়া হাতীৰ।
প্ৰাপ্ত তথ্য মতে, খাদ্যৰ সন্ধানত কাৰ্বি আংলঙৰ বণাঞ্চলৰ পৰা নামি অহা দুই বনৰীয়া হাতীয়ে নিশা জিলা দুখনৰ সীমান্তৰ লংকাজান দৰ্জিচিট অঞ্চলত বিচৰণ কৰি থকা অৱস্থাত হঠাৎ ধৰালৈ নামি অহা বজ্ৰপাতত হাতী দুটায়ে কৰুণভাৱে মৃত্যুক আঁকোৱালি লবলগীয়া হয়।
মৃত হাতী দুটাৰ ভিতৰত এটা প্ৰাপ্তৱয়স্ক মতা হাতী আৰু আনটো দহ বাৰ বছৰ বয়সৰ পুৱালী মতা হাতী। পিছত পূৱা স্থানীয় ৰাইজে কুঁহিয়াৰ এডৰাত হাতী দুটা পৃথকে পৃথকে মৃত অৱস্থাত পৰি থকা প্ৰত্যক্ষ কৰি বন বিভাগক খৱৰ দিয়ে।
আনহাতে ইয়াৰে ডাঙৰ হাতীটোৰ মূৰত আঘাটৰ চিহ্ন পোৱা গৈছে। পিছত ঘটনাস্থলীত হোজাই আৰু লংকা বন বিভাগৰ এটি দল উপস্থিত হৈ হাতী দুটাৰ মৰোনোত্তৰ পৰীক্ষাৰ কৰায়।
বনৰীয়া হাতী দুটাৰ মৃত্যুৰ বাতৰি শুনি বহু লোক ঘটনাস্থলীত উপস্থিত হয়। খাদ্যৰ সন্ধানত ওলাই আহি এনেদৰে হাতী দুটাই মৃত্যুক সাবটি লোৱা ঘটনাই অঞ্চলটোৰ ৰাইজক মৰ্মাহত কৰি তুলিছে।