যেতিয়া এজনী ছোৱালীয়ে সহায় বিচাৰি কৈছিল যে তাইৰ বয়স মাত্ৰ ১২ বছৰ আৰু তাই নিৰ্যাতনৰ পৰা বাচি পলাই আহিছে, তেতিয়া ব্ৰাজিলৰ মানুহে তাইক সহায় কৰিবলৈ নিজৰ ঘৰৰ দুৱাৰ খুলি দিছিল। কিন্তু ব্ৰাজিলৰ আৰক্ষীয়ে এতিয়া এই ছোৱালীজনীৰ এটা আচৰিত সত্য পোহৰলৈ আনিছে। আৰক্ষীৰ মতে, তাই আচলতে এজনী ১২ বছৰীয়া অটিষ্টিক শিশু নাছিল, বৰঞ্চ এগৰাকী ৩৭ বছৰীয়া মহিলাহে আছিল যিয়ে নিজকে অসহায় শিশু সজাই মানুহক প্ৰৱঞ্চনা কৰি আছিল। যোৱা ৩ জুনত আৰক্ষীয়ে এই মহিলাগৰাকীক গ্ৰেপ্তাৰ কৰে। আদালতৰ নথিত তেওঁৰ নাম আমাণ্ডা মাৰিয়া সুজা ডি অলিভেইৰা বুলি চিনাক্ত কৰা হৈছে। তেওঁৰ বিৰুদ্ধে প্ৰৱঞ্চনা আৰু ভুৱা পৰিচয় ব্যৱহাৰ কৰাৰ গোচৰ ৰুজু কৰা হৈছে। তদন্তকাৰীসকলৰ মতে, অলিভেইৰাই ১৪ মাহ ধৰি এটা পৰিয়ালৰ সৈতে ভুৱা পৰিচয়েৰে বাস কৰি আছিল।
এই ঘটনাটোৱে বৰ্তমান ব্ৰাজিলত তীব্ৰ চাঞ্চল্যৰ সৃষ্টি কৰিছে। আৰক্ষীয়ে জনোৱা মতে, ছাও পাওলো, ৰিঅ’ ডি জেনেইৰো, মিনাস জেৰাইচ, ৰিঅ’ গ্ৰেণ্ডে ডো চুল আৰু গোয়াচ আদি বিভিন্ন ৰাজ্যত তেওঁ একেধৰণৰ প্ৰৱঞ্চনা কৰাৰ সন্দেহ কৰা হৈছে। আৰক্ষীয়ে এক বিবৃতিত কয় যে শিশুৰ চৰিত্ৰটো বিশ্বাসযোগ্য কৰিবলৈ এইগৰাকী মহিলাই নিয়মিতভাৱে গাখীৰ খোৱা বটল আৰু পুতলা ব্যৱহাৰ কৰিছিল আৰু শিশুৰ দৰে আচৰণ কৰিছিল। যেতিয়া মানুহে তেওঁৰ মুখখন ডাঙৰ মানুহৰ দৰে দেখা বুলি প্ৰশ্ন কৰিছিল, তেতিয়া তেওঁলোকক পতিয়ন নিয়াবলৈ তেওঁ কৈছিল যে শৈশৱত তেওঁক জোৰকৈ হৰমন চিকিৎসা দিয়া হৈছিল, যাৰ বাবে তেওঁৰ শাৰীৰিক গঠন এনেকুৱা হৈ পৰিছে।
তদন্তকাৰী বিষয়া ৰডৰিগো গুচোৱে সংবাদ মাধ্যমক জনোৱা মতে, এই প্ৰৱঞ্চনাৰ কথা তেতিয়াহে পোহৰলৈ আহে যেতিয়া তেওঁক আশ্ৰয় দিয়া পৰিয়ালটোৰ এজন আত্মীয়ৰ সন্দেহ হয়। সেই আত্মীয়জনে ইণ্টাৰনেটত অনুসন্ধান কৰোঁতে প্ৰায় একে ধৰণৰ এটা ঘটনাৰ খবৰ দেখা পায়। আন ৰাজ্যৰ আৰক্ষীৰ সৈতে তথ্য মিলাই চোৱাৰ পিছত বিষয়াজনে নিশ্চিত কৰে যে দুয়োটা ঘটনাতে এই একেগৰাকী মহিলাই জড়িত আছিল। গ্ৰেপ্তাৰৰ সময়ত মহিলাই নিজৰ অপৰাধ স্বীকাৰ কৰে আৰু কয় যে তেওঁ প্ৰায়ে মিছা কথা কৈ আহিছে। আৰক্ষীৰ মতে তেওঁৰ কোনো মানসিক সমস্যাৰ লক্ষণ দেখা পোৱা নাছিল আৰু তেওঁ সম্পূৰ্ণ সুস্থ মগজেৰে তৰ্কসংগতভাৱে কথা পাতিছিল। অৱশ্যে অলিভেইৰাৰ অধিবক্তাই তেওঁৰ মানসিক স্থিতি পৰীক্ষা কৰাৰ বাবে আদালতত আৱেদন জনাইছে আৰু আদালতে ইয়াৰ অনুমতি দিছে।
ৰিঅ’ ডি জেনেইৰোত নিৰ্যাতিত আৰু অটিষ্টিক শিশুসকলক সহায় কৰা এটা বেচৰকাৰী সংস্থা চলাই থকা দুগৰাকী মহিলাই জনোৱা মতে, ২০২৩ চনতেও এই একেগৰাকী মহিলাই এটা বাবেলেগ নাম ব্যৱহাৰ কৰি তেওঁলোকক প্ৰৱঞ্চনা কৰিছিল। সংস্থাটোৰ পৰিচালিকা ভিভিয়ান হেনৰিক্সে কয় যে চচিয়েল মিডিয়াৰ জৰিয়তে তেওঁলোকৰ সৈতে অলিভেইৰাৰ যোগাযোগ হৈছিল আৰু তেতিয়া তেওঁ নিজৰ নাম ডুডা বুলি চিনাক্ত কৰিছিল। অলিভেইৰাই তেতিয়া দাবী কৰিছিল যে তেওঁৰ পিতৃয়ে তেওঁক জোৰকৈ বেশ্যাবৃত্তিত নিয়োগ কৰিছিল আৰু হৰমন চিকিৎসা কৰাইছিল, যাৰ বাবে তেওঁক বয়সতকৈ ডাঙৰ দেখা যায়। এই কৰুণ কাহিনী শুনি সংস্থাই তেওঁক সহায় কৰিছিল, কিন্তু এতিয়া তেওঁৰ আচল সত্যটো জানিব পাৰি সকলো আচৰিত হৈ পৰিছে।
