পশ্চিমবংগত আজি পুনৰ ব্যাপক নিৰ্বাচনী হিংসাই গা কৰি উঠে।
ৰাজ্য খনত আজি অনুষ্ঠিত হোৱা ভোটগ্ৰহণৰ সময়তে চিআৰপিএফৰ গুলীত ৪ জনকৈ লোকৰ মৃত্যু ঘটে।
নিহত চাৰিও জন লোকেই তৃণমূল কংগ্ৰেছৰ সদস্য বুলি জানিব পৰা গৈছে।
পশ্চিমবংগৰ কোচবিহাৰ জিলাৰ মথাভাঙা বিধানসভা সমষ্টিৰ জোড়পাটকি নামৰ অঞ্চলটোৰ এটা ভোটগ্ৰহণ কেন্দ্ৰত চিআৰপিএফে গুলী চালনা কৰাৰ ফলতে উক্ত লোক কেইজন নিহত হয়।
নিহত লোক কেইজনৰ নাম ক্ৰমে হামিদুল হক,মনিৰুল হক,ছামিয়ুল মিঞাআৰু আমজাদ হোছেইন বুলি জানিব পৰা গৈছে।
গুলীচালনাৰ ঘটনাটোত আন কেইবাজনো লোক গুৰুতৰ ভাবে আহত হৈছে।
আহত কেইবা জনৰো অৱ্স্থা সংকটজনক হোৱালৈ চাই নিহত লোকৰ সংখ্যা আৰু বৃদ্ধি পোৱাৰ আশংকা কৰা হৈছে।
স্থানীয় লোকে অভিযোগ কৰা অনুসৰি ভোটদানৰ বাবে মানুহে শাৰী পাতি থকাৰ সময়তে চিআৰপিএফৰ দলটোৱে ভোটাৰক লক্ষ্য কৰি গুলী চলাবলৈ আৰম্ভ কৰে।
ফলত ঘটনাস্থলীতেো লোক চাৰি জনৰ মৃত্যু হয়।স্থানীয় লোকে লগতে এই বুলিও অভিযোগ কৰে যে পশ্চিমবংগত চিআৰপিএফে বিজেপি দলৰ হৈ কাম কৰি আহিছে।
ইপিনে চিআৰপিএফৰ সূত্ৰই প্ৰকাশ কৰা মতে ভোটাৰ সকলৰ মাজৰে একাংশই চিআৰপিএফৰ দলটোক আক্ৰমণ কৰাৰ বাবেই চিআৰপিএফে গুলী চলাবলৈ বাধ্য হয়।
এই ঘটনাৰ পিছতে সমগ্ৰ অঞ্চলটোত তীব্ৰ উত্তেজনাই বিৰাজ কৰিছে।
