বিশ্বনাথত ৪২০ গৰাকী কৃতী ছাত্ৰ-ছাত্ৰীক ‘আনন্দৰাম বৰুৱা বঁটা’ প্ৰদান
মাধ্যমিক শিক্ষা বিভাগ আৰু বিশ্বনাথ জিলা প্ৰশাসনৰ উদ্যোগত আজি ২০১৮ বৰ্ষৰ ‘আনন্দৰাম বৰুৱা বটা’ বঁটা প্ৰদান কৰা হয়। বিশ্বনাথ মহাবিদ্যালয়ৰ অগ্নি কবি কমলা কান্ত ভট্টাচাৰ্য প্ৰেক্ষাগৃহত অনুষ্ঠিত হোৱা এক অনুষ্ঠানত বিশ্বনাথ জিলাৰ হাইস্কুল শিক্ষান্ত পৰীক্ষাত উত্তীৰ্ণ মেধাৱী ছাত্ৰ-ছাত্ৰীক ২০১৮ বৰ্ষৰ আনন্দৰাম বৰুৱা বঁটা প্ৰদান কৰা হয়।
অনুষ্ঠানত জিলাখনৰ ৮০ খন বিদ্যালয়ৰ মুঠ ৪২০ গৰাকী মেধাৱী ছাত্ৰ-ছাত্ৰীক লেপটপ প্ৰদান কৰা হয়। উল্লেখযোগ্য যে চলিত বৰ্ষত বিশ্বনাথ জিলাত ৪২০ গৰাকী ছাত্ৰ-ছাত্ৰীয়ে আনন্দৰাম বৰুৱা বঁটা লাভ কৰিছে। ইফালে প্ৰথম বিভাগত ৭৫% নম্বৰ পাই সফলতা অৰ্জন কৰা শিক্ষাৰ্থীৰ মাজত বিতৰণ কৰা লেপটপৰ লগত থাকিব দুবছৰৰ বাবে বিনামূলীয়া ইণ্টাৰনেট সেৱা।
এই উপলক্ষে অনুষ্ঠিত হোৱা বটা বিতৰণি অনুষ্ঠানত অসম চৰকাৰৰ হস্ত-তাঁত, বস্ত্ৰ, ৰেচম আৰু সংখ্যালঘু উন্নয়ন দপ্তৰৰ মন্ত্ৰী ৰঞ্জিত দত্ত, ‘এমন্ত্ৰণৰ’ উপাধ্যক্ষ ৰিতুবৰণ শৰ্মা, বিশ্বনাথ সমষ্টিৰ বিধায়ক প্ৰমোদ বৰঠাকুৰ, বিশ্বনাথ জিলা উপায়ুক্ত পৱিত্ৰ ৰাম খাউণ্ড, বিশ্বনাথ জিলা আৰক্ষী অধীক্ষক ৰাকেছ ৰোচনকে আদি কৰি বিশ্বনাথ জিলা প্ৰশাসনৰ বহু কেইজন উচ্চ পদস্থ বিষয়া উপস্থিত থাকে।
উল্লেখযোগ্য যে প্ৰায় চাৰি শতাধিক ছাত্ৰ-ছাত্ৰীসহ অভিভাৱক উপস্থিত থকা উক্ত অনুষ্ঠানত ছাত্ৰ-ছাত্ৰী সকলে লেপটপ আৰু প্ৰশংসা পত্ৰ লাভ কৰি যথেষ্ট উৎফুল্লিত হৈ পৰে আৰু অসম চৰকাৰক ধন্যবাদ জ্ঞাপন কৰে।