মৰাণ আৰু মটক সম্প্ৰদায়ৰ সংগঠনে শুকুৰবাৰে পুৱা ৫ বজাৰ পৰা সমগ্ৰ তিনিচুকীয়া আৰু ডিব্ৰুগড় জিলাত ৪৮ ঘণ্টীয়া বন্ধৰ আহ্বান জনাইছে।
সদ্য সম্প্ৰসাৰিত অসম মন্ত্ৰীসভাৰ পৰা তেওঁলোকৰ প্ৰতিনিধি বাদ পৰা আৰু দুয়োটা সম্প্ৰদায়ক অনুসূচিত জনজাতি (এছ টি) মৰ্যাদা প্ৰদান কৰাত পলম হোৱাৰ প্ৰতিবাদত এই বন্ধৰ কাৰ্যসূচী ঘোষণা কৰা হৈছে।
তিনিচুকীয়াত সদৌ মৰাণ ছাত্ৰ সন্থা (AMSU) আৰু সদৌ অসম মট’ক যুৱ ছাত্ৰ সন্থা (AAMYSA)ৰ যৌথ সংবাদমেলত এই বন্ধৰ কথা ঘোষণা কৰে।
সংগঠনসমূহৰ নেতাসকলে অসমৰ আৰ্থ-ৰাজনৈতিক আৰু নিৰ্বাচনী প্ৰেক্ষাপটত অৱদান আগবঢ়োৱাৰ পিছতো মৰাণ আৰু মট’ক সম্প্ৰদায়ক ৰাজ্য চৰকাৰে একাষৰীয়া কৰি ৰখাৰ অভিযোগ উত্থাপন কৰে।
শদিয়াৰ বিধায়ক বলিন চেতিয়াক সম্প্ৰসাৰিত মন্ত্ৰী পৰিষদৰ পৰা বাদ দিয়াৰ কথাটোও এই প্ৰতিবাদৰ অন্যতম কাৰণ।
সংগঠনসমূহে কয় যে এই সিদ্ধান্তই মৰাণ আৰু মটক জনসাধাৰণৰ আকাংক্ষা আৰু ৰাজনৈতিক প্ৰতিনিধিত্বৰ প্ৰতি অৱহেলাৰ এক ধাৰাবাহিক স্থিতিকে প্ৰতিফলিত কৰিছে।
সংবাদমেলত সংগঠনকেইটাৰ নেতাসকলে কয়, ‘মৰাণ আৰু মটক জনগোষ্ঠীৰ আৱেগ গভীৰভাৱে আঘাতপ্ৰাপ্ত হৈছে। অসম আৰু ইয়াৰ ৰাজনীতিত দশক দশক ধৰি অৱদান আগবঢ়োৱাৰ পাছতো আমাৰ জনসাধাৰণ পৰ্যাপ্ত প্ৰতিনিধিত্ব আৰু স্বীকৃতিৰ পৰা বঞ্চিত হৈয়েই আছে।’
সংগঠনসমূহে অনুসূচিত জনজাতিৰ মৰ্যাদাৰ বাবে দীৰ্ঘদিনীয়া দাবীও পুনৰবাৰ উল্লেখ কৰি কয় যে একেৰাহে চৰকাৰসমূহে সম্প্ৰদায়সমূহৰ প্ৰতি দিয়া প্ৰতিশ্ৰুতিসমূহ পালন কৰাত ব্যৰ্থ হৈছে।
তেওঁলোকে কয় যে স্বাধীনতাৰ প্ৰায় আঠ দশকৰ পাছতো মৰাণ আৰু মট’ক জনগোষ্ঠী জনজাতীয় স্বীকৃতিৰ সৈতে জড়িত সাংবিধানিক সুৰক্ষা আৰু সুযোগৰ পৰা বঞ্চিত হৈয়েই আছে।
যদিহে তেওঁলোকৰ দাবীৰ সঁহাৰি নিদিয়ে তেন্তে দুদিনীয়া বন্ধৰ উপৰি সংগঠনকেইটাই আন্দোলন তীব্ৰতৰ কৰাৰ লগতে অঞ্চলটোৰ শাসকীয় বিজেপিৰ ৰাজনৈতিক কার্যসূচীত বাধা দিব বুলি সকীয়াই দিয়ে ৷
এই বন্ধৰ ফলত দুয়োখন জিলাৰ যাতায়ত, বাণিজ্যিক প্ৰতিষ্ঠান, শিক্ষানুষ্ঠান, দৈনন্দিন ৰাজহুৱা কাম-কাজত প্ৰভাৱ পৰাৰ সম্ভাৱনা আছে।
জৰুৰী আৰু অত্যাৱশ্যকীয় সেৱাসমূহ বন্ধৰ পৰা ৰেহাই দিয়া হ’ব।
কেবিনেট সম্প্ৰসাৰণৰ পিছতে এই ঘোষণা কৰা হৈছে। সম্প্ৰদায় দুটাৰ সংগঠনসমূহে কয় যে প্ৰতিনিধিত্ব আৰু জনজাতীয় মৰ্যাদা তেওঁলোকৰ আন্দোলনৰ মূল বিষয় হৈ থাকিব।
