ৰাজ্য চৰকাৰে বিদ্যুৎ মাচুল ৫ শতাংশ বৃদ্ধিৰ প্ৰস্তাৱ ৰখা বিধেয়ক এখন বৃহস্পতিবাৰে বিধানসভাত গৃহীত কৰে। আনহাতে, বিৰোধী কংগ্ৰেছ দলে ইয়াৰ বিৰোধিতা কৰি সদন ত্যাগ কৰে।
ৰাজ্য চৰকাৰে বাজেটত কৰা ঘোষণা অনুসৰিয়ে সোণোৱাল চৰকাৰে ৫ শতাংশ বিদ্যুৎ মাচুল বৃদ্ধিৰ পদক্ষেপ গ্ৰহণ কৰা বুলি স্পষ্ট কৰি দিয়ে। ইয়াৰ বাবে বৃহস্পতিবাৰে বিধানসভাত অসম বিদ্যুৎ কৰ (সংশোধনী) বিধেয়ক, ২০১৮’ শাসক পক্ষৰ পূৰ্ণ সমৰ্থনত গৃহীত হয়।
আনহাতে, বিৰোধী পক্ষই অনা সংশোধনী প্ৰস্তাৱ খণ্ডন কৰি বিত্তমন্ত্ৰী ডঃ হিমন্ত বিশ্ব শৰ্মাই কয় যে এই কৰ আৰোপৰ ফলত সংগৃহীত ধন বিদ্যুৎ কৰ্মচাৰীসকলৰ পেন্সন পুঁজিত জমা হ’ব। তেওঁ কয় যে এই পেন্সন পুঁজিৰ বাবে ৰাজ্য চৰকাৰে বছৰি অনুদান দিব লাগে। কিন্তু নিয়মীয়াকৈ এই অনুদান সম্পূৰ্ণকৈ আদায় দিব নোৱাৰাত বকেয়াৰ পৰিমাণ ৪৫০০ কোটি টকা হৈছেগৈ। চৰকাৰে এই পৰিমাণৰ ধন আদায় দিব নোৱাৰে কিয়নো সেইটো কৰিবলৈ গ’লে সকলো ধৰণৰ উন্নয়নমূলক কামেই স্তব্ধ হৈ পৰিব।
বৰ্তমান এই কৰ প্ৰতি ইউনিট বিদ্যুতত ২০ পইচাকৈ আৰোপ কৰাৰ বিপৰীতে নতুন সংশোধনী অনুসৰি বিদ্যুৎ মাচুল আৰু স্থায়ী মাচুলৰ ৫ শতাংশ বিদ্যুৎ কৰ (ইলেক্ট্ৰিচিটী ডিউটী) হিচাপে সংগ্ৰহ কৰা হ’ব।
ইয়াৰ পূৰ্বে কংগ্ৰেছ বিধায়িনী দলৰ উপ-দলপতি ৰকিবুল হুছেইনে সদনত কয় যে বৰ্তমান সময়ত বয়-বস্তুৰ দাম বৃদ্ধিত সৰ্বসাধাৰণ জুৰুলা হৈ পৰাৰ সময়ত সংশোধিত বিদ্যুৎ কৰে লোকসকলক অসুবিধাত পেলাব। হুছেইনে সদ্যহতে বিধেয়কখন স্থগিত ৰাখি পৰৱৰ্তী সময়ত বিবেচনাৰ বাবে আনিবলৈ বিত্তমন্ত্ৰীক আহ্বান জনায়।
পিছত অধ্যক্ষই ধ্বনি ভোটত বিধেয়কখন গৃহীত কৰিব বিচৰাৰ সময়তে কংগ্ৰেছ দলৰ বিধায়কসকলে সদন ত্যাগ কৰে। কিন্তু এই প্ৰতিবাদৰ পিছত শাসক পক্ষৰ বিধায়কসকলে বিধেয়কখন গৃহীত কৰে।