পশ্চিম আফ্ৰিকাৰ ৰাষ্ট্ৰ মালিত পাঁচজন ভাৰতীয় নাগৰিক অপহৰণ হোৱাৰ এক দুৰ্ভাগ্যজনক ঘটনাই বিশ্বজুৰি বিতৰ্কৰ সূচনা কৰিছে। সোমবাৰে ভাৰতৰ বৈদেশিক পৰিক্ৰমা মন্ত্ৰালয়ে (MEA) অপহৰণৰ খবৰ নিশ্চিত কৰিছে আৰু কৈছে যে বামাকোস্থিত ভাৰতীয় দূতাবাসে অপহৃতসকলক নিৰাপদে ঘূৰাই অনাটো নিশ্চিত কৰিবলৈ মালিৰ কৰ্তৃপক্ষ আৰু সংশ্লিষ্ট কোম্পানীটোৰ সৈতে প্ৰচেষ্টা চলাই আছে।
উল্লেখ্য যে এই অপহৰণৰ ঘটনাটো যোৱা ৬ নৱেম্বৰ তাৰিখে সংঘটিত হৈছিল।
বামাকোস্থিত ভাৰতৰ দূতাবাসে ‘এক্স’ (পূৰ্বে টুইটাৰ) যোগে এক পোষ্টত কয়: “২০২৫ চনৰ ৬ নৱেম্বৰত আমাৰ পাঁচজন নাগৰিকক অপহৰণ কৰাৰ দুৰ্ভাগ্যজনক কাণ্ডৰ বিষয়ে দূতাবাসে অৱগত। তেওঁলোকৰ নিৰাপদ আৰু সোনকালে মুক্তি নিশ্চিত কৰিবলৈ সকলো স্তৰত প্ৰচেষ্টা চলি আছে।”
নতুন দিল্লীৰ বিষয়াসকলে জনোৱা মতে, বামাকোৰ দূতাবাসে মালিৰ নিৰাপত্তা সংস্থাসমূহৰ সৈতে “অবিৰত যোগাযোগ” বজাই ৰাখিছে। ইয়াৰ উপৰিও, বৈদেশিক পৰিক্ৰমা মন্ত্ৰালয়ৰ মুখ্য কাৰ্যালয়ে এই অঞ্চলৰ নিৰাপত্তা পৰিস্থিতিৰ বিষয়ে জ্ঞাত অন্যান্য বিদেশী মিছন আৰু আন্তঃৰাষ্ট্ৰীয় অংশীদাৰসকলৰ সৈতেও সমন্বয় সাধন কৰি আছে।
স্মৰ্তব্য যে পশ্চিম আফ্ৰিকাৰ অন্যতম অস্থিৰ ৰাষ্ট্ৰ মালিয়ে বছৰ বছৰ ধৰি সংঘাত আৰু অশান্তিৰ সন্মুখীন হৈ আহিছে। ইয়াৰ লগতে আল কায়দা আৰু ইছলামিক ষ্টেটৰ সৈতে জড়িত জেহাদী গোটসমূহৰ উপস্থিতি ক্ৰমাগতভাৱে বৃদ্ধি পাইছে।
বিশেষকৈ মধ্য আৰু উত্তৰ মালিৰ দৰে দুৰ্গম অঞ্চলত বিদেশী শ্ৰমিকসকল সঘনাই অপহৰণৰ লক্ষ্য হৈ আহিছে, য’ত উগ্ৰপন্থী দলসমূহে সীমিত চৰকাৰী নিয়ন্ত্ৰণৰ সুবিধা লৈ নিজৰ কাৰ্য্যকলাপ অবাধে চলাই গৈছে।
