ভাৰতীয় ষ্টেইট বেংকৰ কলিয়াবৰ শাখাত থকা কাঠপাৰাৰ চফিৰ উদ্দিন নামৰ এজন অৱসৰপ্ৰাপ্ত শিক্ষকৰ নিজা বেংক একাউণ্টৰ পৰা ৫ লাখৰো অধিক ধন হৰণলুকী হোৱাৰ খবৰ পোৱা গৈছে।
জানিব পৰা মতে অৱসৰপ্ৰাপ্ত শিক্ষকজনৰ ৩০৭১০৬৩৩৩৭৫ নম্বৰৰ একাউন্টটোৰ পৰা যোৱা ২৩-২৬ আগষ্টৰ ভিতৰত নোহোৱা হয় পাঁচ লাখ দহ হাজাৰ আঠশ চৌৰাশী টকা। বেংকলৈ আহি নিজৰ পাছবুকৰ ধন ৰাশি পৰীক্ষা কৰাতহে এই ভয়ংকৰ তথ্য পোহৰলৈ আহে।
আনহাতে চৰিফ উদ্দিনৰ সমূদায় ধন তেওঁৰ অজ্ঞাতে তেজপুৰৰ আই চি আই চি আই বেংকৰ এটা একাউণ্টলৈ ট্ৰেন্সফাৰ হোৱা বুলি বেংক কৰ্তৃপক্ষই জানিবলৈ দিয়ে।
এই বিষয়ে গম পাই এতিয়া পৰিয়ালটোৰ মাজত এক হাহাকাৰ পৰিস্থিতিৰ সৃষ্টি হৈছে। কোনে কেনেদৰে উক্ত বৃহৎ ধনৰাশি এনেদৰে লোকজনৰ অজ্ঞাতে হৰণলুকী কৰিলে তাকে লৈ এতিয়া পৰিয়ালটোৰ মাজত এক ডাঙৰ প্ৰশ্ন উদয় হৈছে।
সমগ্ৰ জীৱনৰ কষ্টোপাৰ্জিত ধন হেৰুৱাই এতিয়া উপায় বিহীন হৈ পৰিছে অৱসৰপ্ৰাপ্ত শিক্ষকজন। সেয়ে এতিয়া সহায় লৈছে কলিয়াবৰ আৰক্ষীৰ। কলিয়াবৰ আৰক্ষী চকীৰ ভাৰপ্ৰাপ্ত বিষয়া দিন বন্ধু ভূঞাই বিষয়টোত গুৰুত্ব প্ৰদান কৰি কোন দুষ্ট চক্ৰই এই কাণ্ড সংঘটিত কৰিলে তাৰ তদন্ত কৰি উচিত শাস্তি প্ৰদান কৰিব বুলি আশা কৰিছে।
এনে কাণ্ড সংঘটিত হোৱাৰ পাছত এতিয়া ষ্টেইট বেংকৰ শাখাটোত থকা গ্ৰাহকসকলৰ মাজত এটা ডাঙৰ শংকাই দেখা দিছে। সকলোৰে এটাই প্ৰশ্ন বেংকত জমা ৰখা ধনো যেণ সুৰক্ষিত নহয় এইখন দেশত। ৰাজ্যত সঘনাই সংঘটিত হ’বলৈ ধৰা এনে ধন হৰণলুকী আচলতে বেংক কৰ্তৃপক্ষৰ দায়িত্বহীনতা নে চাইবাৰ ক্ৰাইমৰ দপদপনি সেয়াহে ৰহস্যৰ আৱৰ্তত।
