ৰাজ্যৰ বিভিন্ন প্ৰান্তৰ লগতে শিৱসাগৰটো শনিবাৰে ৫১১ সংখ্যক বিশ্ব মহাবীৰ চিলাৰয় দিৱস উদযাপন কৰা হয়।
সদৌ অসম কোচ ৰাজবংশী ছাত্ৰ সন্থা(আক্ৰাছু) শিৱসাগৰ জিলা সমিতিৰ উদ্যোগত আৰু খাটোৱাল গাঁওবাসীৰ সহযোগত শিৱসাগৰত দিনজোৰা কাৰ্যসূচীৰে বীৰজনলৈ শ্ৰদ্ধা নিবেদন কৰাৰ লগতে বিভিন্ন প্ৰতিযোগিতা অনুষ্ঠিত কৰা হয়।
উল্লেখ্য যে অসমৰ যিকেইজনক বীৰ পুৰুষক আজিও মানুহে শ্ৰদ্ধাৰে স্মৰণ কৰে, যাৰ অৱদান অসমীয়া জাতিত আজিও বিজড়িত তাৰ ভিতৰত বিশ্ব মহাবীৰ চিলাৰায়ও অন্যতম।
নৰনাৰায়ণ ৰজাৰ শাসন কালত প্ৰধান সেনাপতি হৈ শত্ৰু পক্ষক চিলাৰ দৰে চোঁ মাৰি পৰাভূত কৰাৰ বাবে তেওঁৰ নাম চিলাৰয় নামে জনাজাত হৈ পৰে।
সেই মহান বীৰজনে ক্ষত্ৰিয় ধৰ্ম পালন কৰাৰ সমানুপাতিকভাৱে গুৰুদুজনাৰ ধৰ্ম প্ৰচাৰৰ ক্ষেত্ৰতও পৃষ্ঠপোষকতা আগবঢ়াছিল। তেঁওৰ এনে বহুমুখী প্ৰতিভাৰ বাবে প্ৰখ্যাত ইতিহাসবিদ আৰ্নল্ড টনবীৰে বীৰজনাক বিশ্ববীৰৰূপে স্বীকৃতি প্ৰদান কৰি গৈছিল।
আজি বিশ্ব মহাবীৰ জনৰ ৫১১সংখ্যক জন্মজয়ন্তী উদযাপন অনুষ্ঠান দিনজোৰা কাৰ্যসূচীৰে বীৰজনাৰ লগত সংগতি ৰাখি বিভিন্ন প্ৰতিযোগিতাৰ লগতে বক্তৃতা অনুষ্ঠান অনুষ্ঠিত হয়।
অনুষ্ঠানৰ মুকলি সভাত বহু গণ্যমাণ্য ব্যক্তিৰ লগতে শিৱসাগৰ বাণিজ মহাবিদ্যলয়ৰ অধ্যক্ষ ড° সৌমাৰজ্যোতি মহন্ত, শিৱসাগৰ ছোৱালী মহাবিদ্যালয়ৰ প্ৰৱক্তা প্ৰবীণ শৰ্মাই বীৰজনাৰ জীৱন আদৰ্শৰ আৰু দৰ্শনৰ ওপৰত তত্বগধূৰ বক্তৃতা প্ৰদান কৰে।
