ছিকিমৰ অতি জনপ্ৰিয় পৰ্যটনস্থলী চাংগু হ্ৰদৰ সমীপৰ উচ্চ অঞ্চলত হোৱা প্ৰবল তুষাৰপাতৰ ফলত মঙলবাৰে এক ভয়ংকৰ পৰিস্থিতিৰ সৃষ্টি হয়। শ্বেৰাথাং আৰু ইয়াৰ আশে-পাশে থকা অঞ্চলসমূহত অত্যাধিক বৰফ জমা হোৱাৰ বাবে ১৫ মাইলৰ পৰা চাংগুৰ মাজৰ পথত ৫৪১ খনকৈ পৰ্যটকৰ বাহন আৱদ্ধ হৈ পৰে। ইয়াৰ ফলত প্ৰায় ২৭৩৬ গৰাকী পৰ্যটক অসহায়ভাৱে পথৰ মাজতে আৱদ্ধ হৈ থাকিবলগীয়া হয়। এই খবৰ পোৱাৰ লগে লগে ছিকিম চৰকাৰৰ পৰ্যটন আৰু অসামৰিক বিমান পৰিবহন বিভাগৰ তৎপৰতাত উদ্ধাৰ অভিযান আৰম্ভ কৰা হয়।
এই উদ্ধাৰ অভিযানত স্থানীয় আৰক্ষী, জিআৰইএফ, বিআৰঅ’ৰ কৰ্মী, পৰ্যটন বিভাগৰ বিষয়া আৰু চালক সন্থাৰ লগতে বিভিন্ন স্থানীয় সংস্থাই সক্ৰিয়ভাৱে অংশগ্ৰহণ কৰে। সকলোৰে যুটীয়া প্ৰচেষ্টা আৰু ক্ষিপ্ৰ পদক্ষেপৰ ফলত আৱদ্ধ হৈ থকা প্ৰতিগৰাকী পৰ্যটকক নিৰাপদে উদ্ধাৰ কৰিবলৈ সক্ষম হোৱা গৈছে। অতি নিয়ন্ত্ৰিত আৰু শৃংখলাবদ্ধভাৱে চলোৱা এই অভিযানৰ ফলত কোনো ধৰণৰ হতাহতি নোহোৱাকৈ সকলো বাহন উদ্ধাৰ কৰা হয়। পৰ্যটন বিভাগে এই সংকটৰ সময়ত সহায় কৰা প্ৰতিটো বিভাগ আৰু স্থানীয় লোকসকলক ধন্যবাদ জ্ঞাপন কৰিছে।
বৰ্তমান পৰিস্থিতিৰ প্ৰতি লক্ষ্য ৰাখি ছিকিমৰ পৰ্যটন বিভাগে সকলো পৰ্যটক আৰু ভ্ৰমণ পৰিচালনাক বিশেষ সাৱধানতা অৱলম্বন কৰিবলৈ পৰামৰ্শ দিছে। বিশেষকৈ বৰফ পৰা সময়ছোৱাত বতৰৰ আগজাননী অনুসৰণ কৰিবলৈ আৰু বাহনসমূহত বৰফৰ ওপৰত চলিব পৰা বিশেষ চেইন ব্যৱহাৰ কৰিবলৈ বিভাগৰ ফালৰ পৰা নিৰ্দেশনা প্ৰদান কৰা হৈছে। পৰ্যটকসকলৰ সুৰক্ষা নিশ্চিত কৰিবলৈ চৰকাৰে সকলোকে সতৰ্ক হৈ থাকিবলৈ আহ্বান জনাইছে।
