শংকৰদেৱ শংঘৰ নগাঁও জিলা শাখাৰ উদ্যোগত জিলা শাখাৰ কাৰ্যালয় প্ৰাংগণত আজিৰ পৰা দুদিনীয়া বৰ্ণাঢ্য কাৰ্যসূচীৰে জগতগুৰু শ্ৰীমন্ত শংকৰদেৱৰ ৫৭০ সংখ্যক আৰ্বিভাৱ উৎসৱ আৰম্ভ হৈছে।
উল্লেখযোগ্য যে, আজি পুৱা কৃষ্ণ বৰাৰ পৰিচালনাত প্ৰাতঃপ্ৰসংগ কাৰ্যসূচীৰে আৰ্বিভাৱ মহোৎসৱ শুভাৰম্ভ হয়। ইয়াৰ পিছতে জিলা শাখাৰ সেৱা বাহিনীৰ উদ্যোগত পৰিৱেশ নিকাকৰণ, মূল তোৰণ উন্মোচন, পুথিভঁড়ালৰ দুৱাৰ উন্মোচন, প্ৰাচীৰ পত্রিকা উন্মোচন, নামঘৰ পৰিচালনা সমিতিৰ উদ্যোগত নাম প্ৰসংগ আদি কাৰ্যসূচী অনুষ্ঠিত হয়।
বিশিষ্ট সমাজ কৰ্মী সঞ্জয় আগৰৱালাই জিলা শাখাৰ সভাকক্ষ উন্মোচন কৰাৰ পিছত শংকৰী সংগীতৰ অনুষ্ঠান উদ্বোধন কৰে শংকৰী সংগীত বিদ্যালয়ৰ অধ্যক্ষ অলীম মহন্তই। তেখেতে ভাষণ প্ৰসংগত কয়, ‘গুৰু ধৰ্মৰ প্ৰতি মানুহৰ অৱহেলা হোৱা দেখা গৈছে। দিনক দিনে খোল তাল বজোৱা মানুহৰ সংখ্যা কমিছে। নীতি শিক্ষাৰ অভাৱৰ বাবে আধ্যাত্মিক আৰু মানৱীয় মূল্যবোধৰ স্খলন ঘটিছে।’
দিনটোৰ কাৰ্যসূচীৰ অন্তত সন্ধিয়ালৈ ৫৭০ গচি বন্তি প্ৰজ্বলনৰে মহাপুৰুষগৰাকীক শ্ৰদ্ধা জনোৱাৰ লগতে নিশালৈ গুৰুজনাৰ অনবদ্য সৃষ্টি অংকীয়া ভাওনা ‘ৰুক্মিণী হৰণ’ কলিয়াবৰৰ অমৃৎ মন্থন শিল্পী সমাজে মঞ্চস্থ কৰে।