গোলাঘাটত ৫৮,২৫৫ পালি প্ৰতিষেধক প্ৰদান : নুমলীগড়ত গুৱাহাটীৰ পৰা অহা যাত্ৰীসহ বাহনৰ কৰ্মচাৰীক কোভিড টেষ্ট
গোলাঘাট জিলাত মংগলবাৰৰ পৰা জিলা উপায়ুক্তৰ নিৰ্দেশক্ৰমে গুৱাহাটীৰ পৰা গোলাঘাটলৈ অহা সকলো বাহনৰ যাত্ৰী, চালক-কৰ্মচাৰীৰ কোভিড পৰীক্ষা কৰা হৈছে।
নুমলীগড়ত গুৱাহাটীৰ পৰা অহা বাহনসমূহ ৰখাই ৰেপিড এন্টিজেন টেষ্ট কৰোৱাৰ বাবে ব্যৱস্থা গ্ৰহণ কৰা হয়। গুৱাহাটীৰ পৰা অহা অধিকাংশ লোকৰ দেহতে কোৱিডৰ সংক্ৰমণ ধৰা পৰাৰ প্ৰতি লক্ষ্য ৰাখি এই সিদ্ধান্ত গ্ৰহণ কৰা হয়।
ইয়াৰ সমান্তৰালভাৱে আজিৰে পৰা গোলাঘাট নগৰৰ বিভিন্ন প্ৰৱেশ পথত মাস্ক পৰিধান নকৰা লোকৰ বিৰুদ্ধে এহেজাৰ টকা পৰ্যন্ত জৰিমনা বিহা হয়।
মাস্ক পৰিধান নকৰা লোকৰ বিৰুদ্ধে জৰিমনা আদায় কৰাৰ বাবে ৬ টা টাস্ক ফৰ্চ অৰ্থাৎ কৰ্মবাহিনী গঠন কৰি দিয়া হৈছে। এই কৰ্মবাহিনীসমূহে গোলাঘাটৰ বিভিন্ন স্থানত মাস্ক নিপিন্ধা লোকৰ বিৰুদ্ধে জৰিমনা বিহি আজি মুঠ ১৭,৫০০ টকা সংগ্ৰহ কৰে।
জিলা উপায়ুক্ত বিভাষ চন্দ্ৰ মোদীয়ে নিজে বিভিন্ন ঠাই পৰিদৰ্শন কৰি পৰিস্থিতিৰ বুজ লোৱাৰ লগতে মাস্ক পৰিধান নকৰা লোকৰ বিৰুদ্ধে জৰিমনা বিহে।
তেওঁ কয় “মাস্ক পৰিধান কৰাটো আচলতে সকলোৰে দায়িত্ব। জৰিমনা বিহাতো আমাৰ উদ্দেশ্য নহয়, প্ৰকৃততে ৰাইজক সজাগ কৰাটোহে আমাৰ উদ্দেশ্য।”
উপায়ুক্ত গৰাকীয়ে লগতে কয় যে সজাগতাইহে এই ৰোগ প্ৰতিৰোধ কৰাত সহায় কৰিব।
ইফালে গোলাঘাট নগৰত আজিও জিলা তথ্য আৰু জনসংযোগ বিষয়াৰ কাৰ্যালয়ৰ উদ্যোগত স্থায়ী অনুভাষ যন্ত্ৰৰ লগতে ভ্ৰাম্যমান বাহনেৰে মাইকৰ সহায়ত সজাগতা সৃষ্টিৰ প্ৰয়াস চলোৱা হয়।
আনহাতে গোলাঘাট জিলাত কোভিড-১৯ৰ প্ৰতিষেধক প্ৰদান কার্যসূচীও অব্যাহত আছে। জিলাখনত আজিৰ দিনটোলৈকে ৫৮,২৫৫ জন লোকক কোভিড প্ৰতিষেধক প্ৰদান কৰা হৈছে।
ইয়াৰে ৪৪,৯৫০ টা প্ৰথম পালি আৰু ১৩,৩০৫ টা দ্বিতীয় পালি প্ৰতিষেধক দিয়া হৈছে।