কোভিড সংক্ৰমণে ভয়াৱহ ৰূপ ধাৰণ কৰিছে দেশৰ অন্যতম প্ৰধান প্ৰদেশ মহাৰাষ্ট্ৰত।
দেশৰ ভিতৰতে দ্বিতীয় ঢৌৰ কোভিড সংক্ৰমণত শীৰ্ষ স্থানত আছে মহাৰাষ্ট্ৰ।
ইতিমধ্যে মহাৰাষ্ট্ৰ চৰকাৰে কোভিড সংক্ৰমণ প্ৰতিৰোধৰ বাবে লোৱা সকলো পদক্ষেপ ব্যৰ্থ হৈছে। কোভিড সংক্ৰমণ বাঢ়ি যোৱাৰ সমান্তৰালভাৱে দুঃচিন্তাও ক্ৰমশঃ বৃদ্ধি হৈছে উদ্ধৱ থাকৰেৰ মহাৰাষ্ট্ৰ চৰকাৰৰ।
ৰাজ্যখনৰ এই অভাৱনীয় পৰিস্থিতিত চৰকাৰে ১৫ দিনৰ বাবে সম্পূৰ্ণ লকডাউন বলৱৎ কৰাৰ বাবে চিন্তা চৰ্চা কৰিছে বুলি বিশেষ সূত্ৰে খবৰ আহিছে।
সূত্ৰটোৰ মতে অহা বুধবাৰ অৰ্থাৎ ২১ এপ্ৰিলৰ পৰা অহা ১৫ দিনলৈ ৰাজ্যখনত সম্পূৰ্ণ লকডাউন বলৱৎ কৰাৰ সম্ভাৱনা আছে।
ইতিমধ্যে ৰাজ্যখনৰ কোভিড পৰিস্থিতৰ পৰ্যালোচনাৰ বাবে মহাৰাষ্ট্ৰ চৰকাৰৰ কেবিনেট বৈঠক অনুষ্ঠিত হৈ গৈছে। উক্ত বৈঠকত মহাৰাষ্ট্ৰৰ কেবিনেটৰ সদস্যসকলে মুখ্যমন্ত্ৰী উদ্ধৱ থাকৰেক ৰাজ্যখনত সম্পূৰ্ণ লকডাউন বলৱৎ কৰিবলৈ অনুৰোধ কৰা বুলি প্ৰকাশ কৰিছে ৰাজ্যখনৰ খোদ স্বাস্থ্য মন্ত্ৰীগৰাকীয়ে।
“কাইলৈ সন্ধিয়া ৮ বজাৰ পৰা ৰাজ্যত সম্পূৰ্ণ লকডাউন ঘোষণা কৰিবলৈ আমি মুখ্যমন্ত্ৰী উদ্ধৱ থাকৰেক অনুৰোধ জনাইছো।” কেবিনেট বৈঠকৰ অন্তত সাংবাদিকৰ আগত মহাৰাষ্ট্ৰৰ স্বাস্থ্য মন্ত্ৰী ৰাজেশ ট’পে-এ এইদৰে কয়।
অক্সিজেনৰ নাটনিয়েই মহাৰাষ্ট্ৰৰ সম্ভাৱ্য লকডাউনৰ কাৰক বুলি ৰাজ্যিক মন্ত্ৰী আছলাম শ্বেইখে সংবাদ মাধ্যমৰ আগত সদৰী কৰিছে।
ইফালে ৰাজ্যখনত লকডাউন বলৱৎ কৰিলে ঔষধৰ দোকানসমূহক ৰেহাই দিয়া হ’ব বুলি জানিব পৰা গৈছে।
উল্লেখ্য যে মহাৰাষ্ট্ৰ চৰকাৰে যোৱা ১৪ এপ্ৰিলত ৰাজ্যখনত ১৫ দিনীয়া জনতা কাৰ্ফিউ ঘোষণা কৰিছিল। কিন্তু জনতা কাৰ্ফিউৱে ৰাজ্যখনত কোভিড সংক্ৰমণ ৰোধ কৰাত সম্পূৰ্ণৰূপে ব্যৰ্থ হৈছে।
সেয়ে মহাৰাষ্ট্ৰ চৰকাৰে আগন্তুক ১৫ দিনৰ বাবে সম্পূৰ্ণ লকডাউন ঘোষণা কৰাৰ সম্ভাৱনা আছে বুলি সূত্ৰটোৱে প্ৰকাশ কৰিছে।
