কাজিৰঙা ৰাষ্ট্ৰীয় উদ্যানত পুনৰ সংঘটিত হৈছে গঁড় হত্যাৰ ঘটনা। চোৰাং চিকাৰীয়ে গঁড় এটা হত্যা কৰি গঁড়টোৰ খৰ্গ কাটি নিয়ে।
মঙলবাৰে বনবিষয়াসকলে উদ্যানখনৰ ক’হৰা ৰেঞ্জৰ হনুমান ফৰেষ্ট কেম্পৰ ওচৰত গঁড়টোৰ মৃতদেহ উদ্ধাৰ কৰে।
‘’তিনি-চাৰিদিন পূৰ্বে গঁড়টোক হত্যা কৰি চোৰাংচিকাৰীয়ে ইয়াৰ খৰ্গটো কাটি নিয়ে,’’-এগৰাকী বন বিষয়াই কয়।
বিষয়াসকলে জানিবলৈ দিয়ে যে চলিত বছৰত উদ্যানখনত এইটোৱে প্ৰথম গঁড় হত্যাৰ ঘটনা।
ইয়াৰ পূৰ্বে যোৱা বছৰৰ আগষ্টত কাজিৰঙা ৰাষ্ট্ৰীয় উদ্যানৰ ক’হৰা ৰেঞ্জত গঁড় হত্যাৰ এক ঘটনা সংঘটিত হৈছিল।
সেইদৰে যোৱা ২০২০ৰ মে’ মাহত চোৰাং চিকাৰীয়ে উদ্যানখনত আন এটা গঁড় হত্যা কৰি ইয়াৰ খৰ্গ কাটি নিছিল।
বনকৰ্মীয়ে উদ্যানখনৰ আগৰাতলি ৰেঞ্জৰ অন্তৰ্গত ডুৱামাৰি বিলৰ সমীপত খৰ্গৰে সৈতে গঁড়টোৰ মৃতদেহ উদ্ধাৰ কৰিছিল।
ৰাষ্ট্ৰীয় উদ্যানখনত যোৱা ২০২০ত তিনিটা গঁড় চিকাৰৰ ঘটনা সংঘটিত হৈছিল।
ইপিনে, ৰাজ্যৰ শাসনাধীষ্ঠ বিজেপি চৰকাৰখনে কাজিৰঙাত গঁড় হত্যা নিৰ্মূল হোৱাৰ দাবী উত্থাপন কৰাৰ মাজতে পুনৰ গঁড় হত্যাৰ ঘটনাই কিহৰ ইংগিত দিয়ে?
সদ্য সমাপ্ত নিৰ্বাচনৰ ফলাফল ওলাবলৈ আৰু মাত্ৰ ১০টা দিন বাকী থকা অৱস্থাত পুনৰ কাজিৰঙাত গঁড় হত্যাৰ ঘটনাই দৰাচলতে কিবা ইংগিত দিছে নেকি সেয়াও লক্ষ্যণীয় হৈ পৰিছে।
যোৱা আঠমাহৰ পাছত পুনৰ কাজিৰঙাত চোৰাং চিকাৰীয়ে গঁড় হত্যা কৰাৰ ঘটনাৰ আঁৰত ৰাজনৈতিক অভিসন্ধি থকাৰ কথাও অস্বীকাৰ কৰিব নোৱাৰি।
ইয়াৰ পূৰ্বে বন বিষয়া আৰু চোৰাং চিকাৰীৰ মাজত থকা গোপন সম্পৰ্কৰ কথা ইতিমধ্যে পোহৰলৈ আহিছিল।
ৰাজ্যত পুনৰ কাৰ চৰকাৰ হ’ব সেয়া ক’ব নোৱাৰি যদিও কাজিৰঙাত চোৰাংচিকাৰীৰ হাতত পুনৰ অসম গৌৰৱ গঁড় হত্যাৰ ঘটনাই বিশেষ তাৎপৰ্য বহন কৰিছে।
