দেশৰ বেংকিং খণ্ডত এক বৃহৎ জালিয়াতিৰ ঘটনাই তীব্ৰ চাঞ্চল্যৰ সৃষ্টি কৰিছে। হাৰিয়ানা চৰকাৰৰ এটা বেংক একাউণ্টৰ পৰা হঠাতে ৫৯০ কোটি টকা নোহোৱা হোৱা কাৰ্যই সমগ্ৰ দেশতে জোকাৰণি তুলিছে। সোমবাৰে এই বৃহৎ জালিয়াতিৰ খবৰ বিয়পি পৰাৰ লগে লগে চৰকাৰী মহলত হুৱাদুৱা লাগে। বিশেষকৈ আইডিএফচি ফাৰ্ষ্ট বেংকত থকা হাৰিয়ানা চৰকাৰৰ এটা নিৰ্দিষ্ট কাৰ্যালয়ৰ একাউণ্টৰ পৰা এই বৃহৎ অংকৰ ধন হৰলুকী হোৱাৰ অভিযোগ উত্থাপন হৈছে। একাউণ্টত জমা থকা ধনৰ পৰিমাণত হঠাতে অমিল দেখা পোৱাৰ পিছতে ৰাজ্যৰ বিজেপি চৰকাৰৰ মাজত হাহাকাৰ লাগে আৰু তাৎক্ষণিকভাৱে দুটা ব্যক্তিগত বেংকত থকা চৰকাৰী একাউণ্টসমূহ বন্ধ কৰিবলৈ নিৰ্দেশ দিয়া হয়।
এই ঘটনাৰ পাছতে হাৰিয়ানাৰ মুখ্যমন্ত্ৰী নয়ব সিং ছাইনীয়ে মঙলবাৰে সংবাদ মাধ্যমৰ আগত এক গুৰুত্বপূৰ্ণ মন্তব্য প্ৰদান কৰে। তেওঁ জনোৱা মতে, একাউণ্টৰ পৰা নোহোৱা হোৱা ৫৯০ কোটি টকা ইতিমধ্যে সম্পূৰ্ণৰূপে উদ্ধাৰ কৰা হৈছে। মাত্ৰ ২৪ ঘণ্টাৰ ভিতৰতে এই বৃহৎ পৰিমাণৰ ধন ঘূৰাই অনাটো এক ডাঙৰ সফলতা বুলি তেওঁ উল্লেখ কৰে। মুখ্যমন্ত্ৰীগৰাকীয়ে লগতে কয় যে ইমান কম সময়ৰ ভিতৰতে ধন উদ্ধাৰ হ’লেও এই ঘটনাৰ মূল কাৰণ আৰু ইয়াৰ আঁৰত থকা লোকসকলক কোনো কাৰণতে ৰেহাই দিয়া নহ’ব।
এই বৃহৎ জালিয়াতিৰ ঘটনাৰ তদন্ত বৰ্তমান তীব্ৰগতিত চলি আছে। আৰম্ভণিৰ তদন্তত সন্দেহ কৰা হৈছে যে আইডিএফচি ফাৰ্ষ্ট বেংকৰ চণ্ডীগড় শাখাৰ একাংশ বিষয়া এই কাণ্ডৰ লগত জড়িত থাকিব পাৰে। মুখ্যমন্ত্ৰী ছাইনীয়ে কঠোৰ সকীয়নী দি কয় যে যদি বেংকৰ কোনো কৰ্মচাৰী বা চৰকাৰী বিষয়াৰ এই জালিয়াতিৰ সৈতে কোনো সম্পৰ্ক থকাৰ প্ৰমাণ পোৱা যায়, তেন্তে তেওঁলোকৰ বিৰুদ্ধে চৰকাৰে বিহিত ব্যৱস্থা গ্ৰহণ কৰিব। বৰ্তমান সমগ্ৰ বিষয়টো তদন্তকাৰী সংস্থাৰ নিৰীক্ষণত আছে আৰু এই অমিলৰ প্ৰকৃত কাৰণ অতি সোনকালে স্পষ্ট হ’ব বুলি আশা কৰা হৈছে।
