পঞ্চম আন্তৰ্জাতিক যোগ দিৱস উপলক্ষে দেশৰ সমগ্ৰ প্ৰান্তৰ লগতে অসমতো কেন্দ্ৰীয়ভাৱে উদযাপন কৰা হয় এই দিৱস। “সুস্থ হৃদযন্ত্ৰৰ বাবে যোগ দিৱস” এই উদ্দেশ্যে গুৱাহাটীৰ সৰুসজাই ষ্টেডিয়ামত অনুষ্ঠিত এই যোগ দিৱসত মুখ্য অতিথি হিচাপে উপস্থিত থাকে মুখ্য মন্ত্ৰী সৰ্বানন্দ সোণোৱাল।
৫০ মিনিট সময় প্ৰায় ১০ হাজাৰ জনতাৰ সৈতে একেলগে ব্যায়াম কৰে মুখ্য মন্ত্ৰীগৰাকীয়ে। তেওঁৰ সৈতে উপস্থিত থাকে শিক্ষা মন্ত্ৰী সিদ্ধাৰ্থ ভট্টাচাৰ্য্য, ৰাজ্যিক স্বাস্থ্য মন্ত্ৰী পিযুষ হাজৰিকা, আইন উপদেষ্টা শান্তনু ভৰালী, মুখ্য সচিব আলোক কুমাৰ, আৰক্ষী সঞ্চালক প্ৰধান কুলধৰ শইকীয়া, আৰক্ষী আয়ুক্ত দীপক কুমাৰ, কামৰূপ মহানগৰ জিলা উপায়ুক্ত বিশ্বজিত পেগুকে ধৰি অন্যান্য উচ্চ পৰ্যায়ৰ বিষয়া সকল।
ৰাজ্যৰ বিভিন্ন প্ৰান্তৰ পৰা অহা যোগ সমিতিসমূহ, ব্যক্তিগত সংস্থাকে ধৰি প্ৰায় ১০ হাজাৰ লোকে একেলগে ব্যায়াম কৰে সৰুসজাই ষ্টেডিয়ামত।
যোগ গুৰু হিচাপে উপস্থিত থাকে স্বামী জী ৰবি শংকৰ।
উল্লেখ্য যে ব্যায়াম আৰম্ভ হোৱাৰ পূৰ্বে যোগ দিৱস উপলক্ষে প্ৰধান মন্ত্ৰী নৰেন্দ্ৰ মোদীয়ে আগবঢ়োৱা ভাষণৰ পোনপটীয়া সম্প্ৰচাৰ দেখুওৱা হয়।
আনহাতে আজিৰ এই যোগ দিৱসৰ দিনটোত অসমবাসীক সম্বোধন কৰি মুখ্য মন্ত্ৰী সোণোৱালে কয় “পঞ্চায়তে পঞ্চায়তে যোগ লৈ যোৱাৰ প্ৰয়াস কৰা হ’ব। ইয়াৰ জৰিয়তে প্ৰতিগৰাকী ব্যক্তি লাভান্বিত হ’ব।”
তেওঁ আৰু কয় “সুস্থ হৃদযন্ত্ৰৰ বাবে এইবাৰৰ যোগ দিৱস উদযাপন কৰা হৈছে। নৰেন্দ্ৰ মোদীয়ে ভাৰতৰ বুকুতে নহয় সমগ্ৰ বিশ্বতে সুস্থ সবল বাতাবৰণ সৃষ্টি কৰিবলৈ সক্ষম হৈছে।”
প্ৰতিখন জিলাতে স্বতঃস্ফুৰ্ত ভাৱে জনসাধাৰণে যোগ কৰিবৰ বাবে ওলাই আহিছে তাৰ বাবে সকলোকে ধন্যবাদ জ্ঞাপন কৰে সোণোৱালে।
