সাৰদীয় দূৰ্গোৎসৱ উপলক্ষে হস্ততাঁত উৎপাদিত বিভিন্ন সাজ-পোচাক আৰু অন্যন্য পণ্য সামগ্ৰী বিক্ৰিৰ বাবে ধেমাজিৰ হস্ততাঁত আৰু বয়ন বিভাগে এখন ৬ দিনীয়া হস্ততাঁত এক্সপোৰ আয়োজন কৰিছে। জিলা পৰ্যায়ৰ হস্ততাঁত এক্সপো-২০১৮ ধেমাজি চহৰত আৰম্ভ হৈছে।
৮ অক্টোবৰত ধেমাজি নগৰ মহিলা শিল্প ব্যৱসায়ী সমবায় সমিতিৰ চৌহদত স্থানীয় বিধায়ক ৰণোজ পেগুৱে ধেমাজিৰ উপায়ুক্ত আৰএ কোৰাটি আৰু আন আন বিভাগীয় বিষয়াবৰ্গৰ উপস্থিতিত এক্সপো-২০১৮ৰ আনুষ্ঠানিকভাৱে উদ্বোধন কৰে। তেওঁ কয় যে হস্ততাঁত উৎপাদিত সামগ্ৰী অসমৰ সমাজ জীৱনৰ অবিচ্ছেদ্য অংগ। ৰাজ্যখনৰ হস্ততাঁত খণ্ডটোক উদগনি দি ইয়াক সুৰক্ষিত কৰিব লাগে বুলিও বিধায়কগৰাকীয়ে কয়।
বিধায়ক পেগুৱে কয় যে অসমত কৃষিৰ পাছতেই হস্ততাঁত হৈছে পৰৱৰ্তী সংগঠিত উদ্যোগ। মহিলাসকলে হস্ততাঁতৰ জৰিয়তে ঘৰুৱা অৰ্থনৈতিক দিশটো শক্তিশালী কৰে।
বিধায়কগৰাকীয়ে আৰু জানিবলৈ দিয়ে যে ৰাজ্য চৰকাৰে ধেমাজি, লখিমপুৰ, বিশ্বনাথ আৰু মাজুলী জিলাক লৈ চলিত বছৰৰ অক্টোবৰ মাহতেই মাজুলীত হস্ততাঁত আৰু বস্ত্ৰৰ ওপৰত এখন সন্মিলন আয়োজিত কৰাৰ কথা পৰিকল্পনা কৰিছে।
ধেমাজিৰ হস্ততাঁত আৰু বয়ন বিভাগৰ তত্বাৱধায়ক চম্পক শইকীয়াই জনাইছে যে এই এক্সপোখনত ৮০ টা প্ৰাথমিক শিপিনী গোট আৰু ২০টা এনআৰএলএমৰ দ্বাৰা পৰিচালিত আত্মসহায়ক গোটৰ পৰা মুঠ ১০০০ গৰাকী শিপিনীয়ে যোগদান কৰিছে। বোৱনীসকলে তেওঁলোকৰ উৎপাদিত সামগ্ৰী ৰাজ-সাহায্যপ্ৰাপ্ত হাৰত বিক্ৰি কৰিছে।
শইকীয়াই আৰু জনাইছে যে জিলাখনত ৫০,০০০তকৈও অধিক পঞ্জীয়নভুক্ত শিপিনী আছে। এই শিপিনীসকল বিভিন্ন হস্ততাঁত আঁচনি/প্ৰকল্পৰ অন্তৰ্গত আৰু তেওঁলোকে অৰ্থনৈতিকভাৱে স্বাৱলম্বন লাভ কৰাৰ বাবে বিভিন্ন দক্ষতা বিকাশৰ প্ৰশিক্ষণো লৈছে।
এস্কপোত বিক্ৰিৰ বাবে অনা সামগ্ৰীসমূহৰ মাজত আছে অসমীয়া গামোচা, পাট আৰু মুগাৰ কাপোৰ, বিভিন্ন জনজাতীয় সাজ-পোচাক ইত্যাদি।
ৰাজ্যৰ হস্ততাঁত আৰু বয়ন বিভাগৰ সঞ্চালক বিষ্ণু কমল বৰাই ধেমাজিত উপস্থিত হৈ এক্সপোৰ কাম-কাজসমূহ পৰিদৰ্শন কৰে। উদ্বোধনীৰ দিনা এক্সপোখনত ৰাইজে বিপুল সংখ্যাত অংশগ্ৰহণ কৰে। জোনাই, শিলচৰ, ধেমাজি আৰু গোগামুখৰ শিপিনীসকলেও এই এক্সপোত অংশগ্ৰহণ কৰাৰ ইচ্ছা ব্যক্ত কৰিছে।
অহা শনিবাৰে এক্সপোখনৰ সমাপ্তি হ’ব।