নতুন যান বাহন আইন বলবৎ হোৱাৰ পাছত যান-বাহনৰ যিদৰে চালান কাটিবলৈ আৰম্ভ কৰিছে সেইটোৱে দেশজুৰি চাঞ্চল্যৰ সৃষ্টি কৰিছে।
বহু কেইবাৰ চালানৰ জৰিমনাৰ ধন ইমান বৃহৎ অংকৰ হৈ পৰিছে যে বাহনৰ মালিক উপায়বিহীন হৈ পৰিছে।
শেহতীয়া বাতৰি অনুসৰি উৰিষ্যাৰ চম্বলপুৰত এখন ট্ৰাকৰ ৬লাখ ৫০ হাজাৰ ১০০ টকাৰ বৃহৎ পৰিমানৰ চালান কটা হৈছে।
ট্ৰাকখন নাগালেণ্ডৰ আছিল আৰু ট্ৰাকখনৰ মালিকে ২০১৪ চনৰ জুলাইৰ পৰা ২০১৯ চনৰ ছেপ্টেম্বৰলৈকে টেক্স জমা দিয়া নাছিল।
তদুপৰি, ট্ৰাকখনৰ পাৰ্মিট, প্ৰদূষণ প্ৰমান পত্ৰ আৰু ইঞ্চুৰেন্সো নাছিল। ট্ৰাকখনৰ মালিক শৈলেশ শংকৰ লাল গুপ্তা নাগালেণ্ডত থাকে।
ইয়াৰ পূৰ্বে দিল্লীত এখন ট্ৰাকৰ ২লাখ ৫০০ টকাৰ চালান কটা হৈছিল। ৰাম কিষন নামৰ ট্ৰাক চালকজনে ২ লাখ ৫০০ টকাৰ জৰিমনা হিচাপে চালান ভৰিবলগীয়া হৈছিল।
উল্লেখযোগ্য যে নতুন আইন অনুসৰি ট্ৰেফিক নিয়ম উলংঘাৰ বাবে জৰিমনাৰ ধন প্ৰায় দহ গুণ বৃদ্ধি কৰা হৈছে।
যোৱা ১ ছেপ্টেম্বৰৰ পৰা নতুন আইন প্ৰযোজ্য হৈছে। এই আইন বলবৎ হোৱাৰ পাছত বাহনৰ দামতকৈয়ো অধিক বাহনৰ চালান কটা দেখা গৈছে।
চালান কটাৰ এই নতুন ব্যৱস্থাত বহুলোক অসন্তুষ্টও হৈ পৰিছে। জনসাধাৰণৰ এনে অসন্তুষ্টিৰ প্ৰতি লক্ষ্য ৰাখি কেইখনমান ৰাজ্যই আকৌ নতুন যান-বাহন আইনৰ বিৰোধিতাও কৰিছে।
অসমতো এই নতুন আইনৰ অধীনত চালান কটাৰ আৰম্ভণি কৰাৰ খৱৰ পোৱা গৈছে। অৱশ্যে, এতিয়ালৈকে ব্যাপক ৰূপত অভিযান আৰম্ভ কৰা হোৱা নাই।
অসমৰ বহু গাড়ীৰ মালিক, বাইক চালক তথা আন গাড়ী চালকৰ নথি পত্ৰ সঠিক নোহোৱাৰ বাবে ব্যাপক মাত্ৰাত চালানৰ সন্মুখীন হোৱাৰ সম্ভাৱনা আছে। সেয়েহে, এনে পৰিস্থিতিৰ পৰা ৰক্ষা পাবলৈ সকলোৱে নথি পত্ৰ ঠিক ঠাক কৰি ৰখা উচিত।
