দেশৰ ৭১ সংখ্যক গণৰাজ্য দিৱসৰ প্ৰাকমুহূৰ্তত ইয়াক সম্পূৰ্ণ নাকচ কৰি ২৬ জানুৱাৰিৰ দিনটোত পুৱা ৬ বজাৰ পৰা সন্ধিয়া ৬ বজালৈ “সম্পূৰ্ণ বন্ধ”ৰ আহ্বান জনাইছে উত্তৰ-পূবৰ ৬টা বিদ্ৰোহী সংগঠনে।
সংগঠনকেইটাই সংবাদ মাধ্যমলৈ ইয়াৰ নেতৃবৰ্গৰ স্বাক্ষৰ থকা এটা যুটীয়া বিবৃতি প্ৰেৰণ কৰিছে।
যুটীয়া বিবৃতিটোত কয়, “সংযুক্ত চৰকাৰখনৰ এজেন্সিবোৰ আৰু উত্তৰ-পূবৰ ৰাজ্য চৰকাৰবোৰে এই তাৰিখটোত এই অঞ্চলটো গণৰাজ্য দিৱস আয়োজনৰ পৰিকল্পনা কৰিছে। কিন্তু এইটো এই অংশটোৰ ওপৰত সম্পূৰ্ণভাৱে সংগতিহীন এটা আৰোপণ, কাৰণ এই অঞ্চলটোৰ নাগৰিকসকলক গণৰাজ্য প্ৰকৃত অৰ্থত উপভোগ কৰিবলৈ দিয়া নহয়। তথাকথিত ভাৰতৰ প্ৰজাতান্ত্ৰিক সংবিধানখন এই অঞ্চলটোৰ জনগণক প্ৰজাতান্ত্ৰিক স্বাধীনতা উপভোগ কৰিবলৈ দিয়াত ব্যৰ্থ হৈছে। আমাৰ অঞ্চলত থকা ভাৰতীয় শাসক তাত্ত্বিকভাৱেহে প্ৰজাতান্ত্ৰিক। কিন্তু বাস্তৱিকতে খিলঞ্জীয়া লোকসকলৰ ওপৰত নিপীড়ন অব্যাহত আছে, যিটো প্ৰজাতন্ত্ৰ ধাৰণাটোৰ সম্পূৰ্ণ বিৰোধমূলক। নিপীড়ন মানে ভাৰতৰ সৈতে থকা অন্যায়পূৰ্ণ সম্পৰ্ক। আমি WESEA (Western South East Asia West East)-ৰ জনগণ শোষিত জনতা”।
বিবৃতিটোত আৰু কোৱা হয়, “আমি সমগ্ৰ WESEA অঞ্চলত ২৬ জানুৱাৰি, ২০২০-ৰ দিনটোত পুৱা ৬ বজাৰ পৰা সন্ধিয়া ৬ বজালৈ সম্পূৰ্ণ বন্ধৰ আহ্বান জনাইছো, যাতে আমাৰ অঞ্চলত এই আনুষ্ঠানিক উদযাপন বন্ধ কৰিব পৰা যায়।”
বিবৃতিটোত সকলোকে তেওঁলোকৰ আহ্বানৰ প্ৰতি সঁহাৰি জনাই গণৰাজ্য দিৱস উদযাপনৰ পৰা বিৰত থাকিবলৈ কয়।
বিবৃতি দিয়া সংগঠনকেইটা হ’ল-
Hynniutrep National Liberation Council (HNLC), Kanglei Yawol Kanna Lup (KYKL), Kangleipak Communist Party (KCP), National Liberation Front of Twipra (NLFT), Kamatapur Liberation Organization (KLO) আৰু People’s Democratic Council of Karbi Longri (PDCK).
