আলফা, পিডিচিকে, য়ুপিআৰএফ আৰু ডিএনএলএ-এই চাৰিটা বিদ্ৰোহী সংগঠনৰ মুঠ ৬৩জন সদস্যই সোমবাৰে মুখ্যমন্ত্ৰী সৰ্বানন্দ সোণোৱালৰ সন্মুখত আনুষ্ঠানিকভাৱে আত্মসমৰ্পণ কৰে৷
অনুষ্ঠানটোত আলফা স্বাধীনৰৰ ১৭জন, পিডিচিকেৰ সেনাধ্যক্ষ, য়ুপিআৰএফৰ ৩২জন আৰুডিএনএলএৰ ১৩জনকে ধৰি মুঠ ৬৩জন বিদ্ৰোহী সদস্যই আত্মসমৰ্পণ কৰে।
এই অনুষ্ঠানতে আলফা স্বাধীনৰ উপ মুখ্য সেনাধ্যক্ষ দৃষ্টি ৰাজখোৱা ওৰফে মনোজ ৰাভায়ো পত্নীৰে সৈতে আত্মসমৰ্পণ কৰে।
অনুষ্ঠানত মুখ্য অতিথি হিচাপে উপস্থিত থাকি মুখ্যমন্ত্ৰী সৰ্বানন্দ সোণোৱালে আত্মসমৰ্পণ কৰা সকলো নেতা-সদস্যক মুলসুঁতিলৈ আদৰণি জনায়৷
মুখ্যমন্ত্ৰীয়ে কয়, “উগ্ৰপন্থাৰে ৰাষ্ট্ৰবিৰোধী, সংবিধানবিৰোধী কাৰ্যত লিপ্ত হোৱাসকলে আজি উপলব্ধি কৰিছে যে অস্ত্ৰৰে নহয়, মূলসুঁতিলৈ আহিহে সমাজ গঢ়িব পাৰি৷ অস্ত্ৰ এৰি মূলসুঁতিলৈ অহা সকলোকে ধন্যবাদ জনাইছো।’’
মুখ্যমন্ত্ৰীয়ে কয় যে প্ৰধানমন্ত্ৰী নৰেন্দ্ৰ মোদীয়ে সকলোকে লগত লৈ বিকাশৰ শ্লোগান দিছে৷। এক ভাৰত, শ্ৰেষ্ঠ ভাৰত বনাবলৈ সকলো আগবাঢ়ি আহিব লাগিব। মুখ্যমন্ত্ৰীয়ে যিসকল এতিয়াও অহা নাই তেওঁলোককো আহিবলৈ আহ্বান জনায়।
আত্মসমৰ্পণ কৰা সকলোকে সন্মান সহকাৰে জীৱন নিৰ্বাহ কৰাৰ দিহা কৰা হ’ব বুলি উল্লেখ কৰি মুখ্যমন্ত্ৰীয়ে চৰকাৰী আঁচনি বোৰ গ্ৰহণ কৰিবলৈয়ো আহ্বান জনায়।
তেওঁ কয় যে আমি দেশক আগবঢ়াই নিবলৈ ইঞ্জিন হিচাপে কাম কৰিব লাগিব।
অনুষ্ঠানত উপস্থিত থাকি মুখ্য সচিব জিষ্ণু বৰুৱাই ইউনিফাইড কামাণ্ডৰ অধীনত ৰাজ্যৰ আইন-শৃংখলাৰ পৰিৱেশ উন্নত হোৱা বুলি দাবী কৰে। আত্মসমৰ্পণ কৰা সকলো সদস্যক সংস্থাপনৰ দিহা কৰা হৈছে বুলি জানিবলৈ দি বৰুৱাই সকলোকে চৰকাৰী আঁচনিসমূহ গ্ৰহণ কৰিবলৈ আহ্বান জনায়।
আত্মসমৰ্পণ অনুষ্ঠানত এতিয়াও অস্ত্ৰ সম্বৰণ নকৰা বিদ্ৰোহীসকলক কঠোৰ সকীয়নি দিয়ে আৰক্ষী সল্চালক প্ৰধান ভাস্কৰজ্যোতি মহন্তই৷
তেওঁ কয় যে যিসকলে দেশত অশান্তি কৰিবলৈ চেষ্টা কৰিব তেওঁলোকক ৰেহাই দিয়া নহ’ব৷ এতিয়াও যিসকলে অহা নাই তেওঁলোকেও আত্মসমৰ্পণ কৰক আৰু চৰকাৰে যিবোৰ সুবিধা দিছে সেয়া গ্ৰহণ কৰক।
অসম আৰক্ষীৰ বিশেষ শাখাৰ মহাপৰিদৰ্শক হীৰেন নাথে আঁত ধৰা আত্মসমৰ্পণৰ অনুষ্ঠানটোত চিআৰপিএফ, সেনা এছএছবি আৰু বিএছএফৰ শীৰ্ষবিষয়াসকলো উপস্থিত থাকে।