মঙলবাৰে পুৱা ধাৰাসাৰ বৰষুণৰ মাজতে কেৰালাৰ ৱায়ানাড জিলাৰ মেপ্পাডিৰ সমীপৰ পাহাৰীয়া অঞ্চলত ব্যাপক ভূমিস্খলনৰ ফলত কমেও ৬৩ জন লোকৰ মৃত্যু হোৱাৰ লগতে ১১৬ জন আহত হোৱাৰ লগতে শতাধিক লোক আবদ্ধ হৈ পৰাৰ আশংকা কৰা হৈছে। চাৰি ঘণ্টাৰ ভিতৰত ৱায়ানাডত তিনিটাকৈ ভূমিস্খলন হোৱাৰ ফলত এন ডি আৰ এফ আৰু সেনাকে ধৰি একাধিক সংস্থা উদ্ধাৰ অভিযানৰ বাবে নিয়োগ কৰা হৈছে।
মুণ্ডক্কাই, চৌৰলমালা, আট্টামালা, আৰু নুলপুজা গাঁওসমূহ আটাইতকৈ বেছি ক্ষতিগ্ৰস্ত অঞ্চলৰ ভিতৰত আছিল। বহু লোকক চলিয়াৰ নদীত উটুৱাই নিয়াৰ আশংকা কৰা হৈছে।
এক বিবৃতিত ভাৰতীয় সেনাই চিকিৎসা দলকে ধৰি ২২৫ জন জোৱান নিয়োগ কৰা বুলি জানিবলৈ দিয়ে। বায়ুসেনাৰ দুখন হেলিকপ্টাৰ, এখন মি-১৭ আৰু এখন এ এল এইচ (এডভান্সড লাইট হেলিকপ্টাৰ)কো সেৱাত যোগদান কৰা হৈছে।
কেৰালাৰ মন্ত্ৰী বীনা জৰ্জে কয় যে ভাৰতীয় নৌসেনাৰ এটা দলেও উদ্ধাৰ অভিযানত সহায় কৰিব। জিলাখনৰ এখন দলং যিয়ে ক্ষতিগ্ৰস্ত অঞ্চলসমূহক নিকটতম চহৰ চৌৰালমালা চহৰৰ সৈতে সংযোগ কৰিছিল, সেই দলংখনো জাহ গৈছে বুলি জৰ্জে কয়।
প্ৰধানমন্ত্ৰী নৰেন্দ্ৰ মোদীয়ে মুখ্যমন্ত্ৰী পিনাৰায়ী বিজয়নৰ সৈতে বাৰ্তালাপ কৰি সংকটৰ মোকাবিলা কৰিবলৈ কেন্দ্ৰৰ পৰা সকলো সহায়ৰ আশ্বাস দিয়ে।
ভূমিস্খলনত নিহতসকলৰ পৰিয়ালক ২ লাখ টকাৰ ক্ষতিপূৰণ দিয়াৰ কথা ঘোষণা কৰিছে প্ৰধানমন্ত্ৰীৰ কাৰ্যালয়ে। আহতসকলে লাভ কৰিব ৫০ হাজাৰ টকা।
এক বিবৃতিত কেৰেলাৰ মুখ্যমন্ত্ৰী পিনাৰায় বিজয়নে কয় যে চলি থকা সাহায্য প্ৰচেষ্টা চোৱাচিতা কৰিবলৈ ৱায়ানাদত পাঁচজন মন্ত্ৰীৰ এটা প্ৰতিনিধি দল নিযুক্তি দিয়া হৈছে।
ইফালে ভূমিস্খলনৰ পৰিপ্ৰেক্ষিতত এটা কন্ট্ৰল ৰুম মুকলি কৰা হয়। জৰুৰীকালীন সাহায্যৰ বাবে হেল্পলাইন নম্বৰ ৯৬৫৬৯৩৮৬৮৯ আৰু ৮০৮৬০১০৮৩৩ জাৰি কৰা হয়।
এক্সত এটা পোষ্টত ৱায়ানাদৰ প্ৰাক্তন সাংসদ ৰাহুল গান্ধীয়ে কয় যে তেওঁ ভূমিস্খলন আৰু ইয়াৰ ফলত হোৱা লোকৰ প্ৰাণ হেৰুৱাৰ বাবে গভীৰভাৱে যন্ত্ৰণাত ভুগিছে। কংগ্ৰেছৰ সাংসদ কে চি ভেনুগোপালে কয় যে ৰাহুল গান্ধী আৰু প্ৰিয়ংকা দুয়োজনেই হয়তো ৱায়ানাড ভ্ৰমণ কৰিব।
