অহা ২৪ ফেব্ৰুৱাৰীত গুৱাহাটীৰ শ্ৰীমন্ত শংকৰদেৱ আন্তৰ্জাতিক কলাক্ষেত্ৰত মহাপুৰুষ শ্ৰীমন্ত শংকৰদেৱ বিশ্ববিদ্যালয়ৰ ষষ্ঠ সমাৱৰ্তন অনুষ্ঠান অতি আড়ম্বৰপূৰ্ণভাৱে অনুষ্ঠিত হ’ব। এই বিশেষ অনুষ্ঠানটোত বিশ্ববিদ্যালয়ৰ আচাৰ্য ভৱেন্দ্ৰনাথ ডেকা উপস্থিত থকাৰ লগতে ৰাজ্যৰ শিক্ষামন্ত্ৰী ড° ৰণোজ পেগুৱে মুখ্য অতিথি হিচাপে অংশগ্ৰহণ কৰিব। ইয়াৰ উপৰি নতুন দিল্লীৰ এন.ই.চি.টি.এ.আৰৰ সঞ্চালক প্ৰধান ড° অৰুণ কুমাৰ শৰ্মাই সমাৱৰ্তনত দীক্ষান্ত বক্তা হিচাপে উপস্থিত থাকি ছাত্ৰ-ছাত্ৰীসকলক উদ্দেশ্যি ভাষণ প্ৰদান কৰিব।
এই বৰ্ষৰ সমাৱৰ্তনৰ এক অন্যতম বিশেষত্ব হ’ল ৰাজ্যৰ দুজন পুৰোধা ব্যক্তিলৈ আগবঢ়োৱা সন্মান। বিশ্ববিদ্যালয়ৰ পঞ্জীয়ক ড° শৰৎ হাজৰিকাই সদৰী কৰা মতে, অসমৰ বিশিষ্ট সাহিত্যিক অধ্যাপক নগেন শইকীয়াক সন্মানীয় ডি.লিট উপাধি প্ৰদান কৰা হ’ব। একেদৰে বিশিষ্ট শিক্ষাবিদ তথা বিজ্ঞানী ড° দীনেশ চন্দ্ৰ গোস্বামীক সন্মানীয় ডি.এচ.চি উপাধিৰে বিভূষিত কৰা হ’ব। এই দুইগৰাকী বৰেণ্য ব্যক্তিক তেওঁলোকৰ কৰ্মৰাজিৰ বাবে বিশ্ববিদ্যালয়ে এই স্বীকৃতি প্ৰদান কৰাৰ সিদ্ধান্ত গ্ৰহণ কৰিছে।
শৈক্ষিক দিশৰ পৰা চাবলৈ গ’লে এই সমাৱৰ্তনত তিনিটা শৈক্ষিক বৰ্ষৰ মুঠ ৭৯ গৰাকী গৱেষকক পি এইচ ডি ডিগ্ৰী প্ৰদান কৰা হ’ব। ইয়াৰ উপৰি স্নাতক, স্নাতকোত্তৰ আৰু বিভিন্ন ডিপ্লোমা পাঠ্যক্ৰম সফলতাৰে উত্তীৰ্ণ হোৱা ৭৬৮ গৰাকী ছাত্ৰ-ছাত্ৰীক আনুষ্ঠানিকভাৱে ডিগ্ৰী প্ৰদান কৰা হ’ব। বিশ্ববিদ্যালয়খনৰ উপাচাৰ্য অধ্যাপক অশোক কুমাৰ বৰা, পঞ্জীয়ক ড° শৰৎ হাজৰিকা আৰু সমন্বয়ক কুশল ঠাকুৰীয়াই এই পবিত্ৰ দীক্ষান্ত সমাৰোহত বিশ্ববিদ্যালয়ৰ শুভাকাংক্ষী সকলৰ উপস্থিতি আন্তৰিকতাৰে কামনা কৰিছে।
