ভয়াৱহ সংকটত পৰিছে এয়াৰ ইণ্ডিয়া! আহমেদাবাদ দুৰ্ঘটনাৰ পাছত প্ৰায় প্ৰতিদিনে কোনো ধৰণৰ বিদ্যুৎ বিচ্ছিন্ন হোৱাৰ খবৰ পোহৰলৈ আহিছে। কেৱল মঙলবাৰে এয়াৰ ইণ্ডিয়াৰ ৭খন বিমান বাতিল কৰা হয়। ইয়াৰে ৬ খন ড্ৰিমলাইনাৰ। সামগ্ৰিকভাৱে সংগঠনটোৰ কাম-কাজত চৰম অপব্যৱস্থাপনাৰ অভিযোগ উত্থাপন হৈছে। ডিজিচিএই খৰখেদাকৈ এয়াৰ ইণ্ডিয়াৰ শীর্ষ বিষয়াক বৈঠকৰ বাবে মাতিলে৷
অসামৰিক বিমান পৰিবহণ সঞ্চালকালয়ৰ বিষয়াসকলে আজি বিয়লি ভাৰ্চুৱেল বৈঠকৰ বাবে এয়াৰ ইণ্ডিয়া আৰু এয়াৰ ইণ্ডিয়া এক্সপ্ৰেছৰ শীৰ্ষ কাৰ্যবাহীসকলক ফোন কৰে। সূত্ৰ অনুসৰি এই বৈঠকত উপস্থিত থাকে ডি জি চি এৰ সঞ্চালক ফৈজ আহমেদ কিদৱা। এয়াৰ ইণ্ডিয়াৰ চিইঅ’ এমডি কেম্পবেল উইলছন, ফ্লাইট অপাৰেচনৰ সঞ্চালক কেপ্তেইন পংকুল মাথুৰ, এয়াৰ ইণ্ডিয়া এক্সপ্ৰেছৰ চিইঅ’ আলোক সিং আদি। সূত্ৰসমূহে দাবী কৰিছে যে ডিজিচিএই এয়াৰ ইণ্ডিয়াক সকলো পাইলটৰ প্ৰশিক্ষণ আৰু কৰ্মক্ষমতাৰ প্ৰতিবেদন বিচাৰিছে। তদুপৰি দেশৰ সকলো বিমান প্ৰশিক্ষণ প্ৰতিষ্ঠানকো সকীয়াই দিয়া হৈছে।
ইফালে মঙলবাৰে একেদিনাই এয়াৰ ইণ্ডিয়াৰ ৬খন বিমান বাতিল কৰা হয়। দিল্লীৰ পৰা ডুবাইলৈ AI915, দিল্লীৰ পৰা ভিয়েনালৈ AI153, দিল্লীৰ পৰা পেৰিছলৈ AI143, আহমেদাবাদৰ পৰা লণ্ডনলৈ AI159, লণ্ডনৰ পৰা অমৃতসৰলৈ AI170, বেংগালুৰুৰ পৰা লণ্ডনলৈ AI133 আৰু মুম্বাইৰ পৰা ছান ফ্ৰান্সিস্কোলৈ AI179 বিমান বিভিন্ন কাৰণত বাতিল কৰা হৈছে। ইয়াৰে প্ৰথম ছয়খন হৈছে ড্ৰিমলাইনাৰ।
যান্ত্ৰিক সমস্যাৰ বাবে প্ৰায় সকলো বিমান বাতিল কৰা হৈছে। ফলত যাত্ৰীসকলে চৰম সমস্যাৰ সন্মুখীন হৈছে। যদিও এয়াৰ ইণ্ডিয়াই যাত্ৰীসকলৰ বাবে বিকল্প বিমান, ৰিফাণ্ড, বা হোটেলত থকাৰ ব্যৱস্থা কৰিছিল, তথাপিও এই দুখ-কষ্টৰ পৰা হাত সাৰিব পৰা নাছিল। কিন্তু বাৰে বাৰে বিজুলী বিচ্ছিন্নতা কিয়? সমস্যাটো ঠিক ক’ত? মঙলবাৰে ডিজিচিএৰ তদন্তৰ বাবে এক উচ্চ পৰ্যায়ৰ বৈঠক অনুষ্ঠিত হয়।
