বিগত বৰ্ষবোৰৰ গৌৰৱোজ্জল ইতিহাসৰ পুনৰাবৃত্তি ঘটায় ফাৰ্মাচী শিক্ষাৰ অগ্ৰণী শিক্ষানুষ্ঠান গুৱাহাটীৰ আজাৰাস্থিত গিৰিজানন্দ চৌধুৰী ইনষ্টিটিউট অৱ ফাৰ্মাচিউটিকেল চায়েন্স চমুকৈ জিআইপিছৰ ৭জনকৈ শিক্ষাৰ্থীয়ে ৰাষ্ট্ৰীয় পৰ্যায়ৰ প্ৰতিযোগিতামূলক পৰীক্ষা, গ্ৰেজুৱেট ফাৰ্মাচী এপটিটিউত টেষ্ট চমুকৈ জিপেট, ২০২১ত সৰ্বভাৰতীয় পৰ্যায়ত স্থান দখলেৰে শিক্ষানুষ্ঠানখনৰ নাম উজলাই তুলিবলৈ সক্ষম হৈছে।
শিক্ষানুষ্ঠানখনৰ সাফল্য লাভ কৰা শিক্ষাৰ্থীসকলৰ ভিতৰত বি.ফাৰ্মৰ অষ্টম ষাণ্মাসিকৰ তেজপুৰ নিবাসী অভিস্পিৎ কলিতা নামৰ কৃতী ছাত্ৰজনে ইতিহাস সৃষ্টি কৰি পূৱ ভাৰতৰ ভিতৰতে সৰ্ব্বোচ্চ নম্বৰ লাভ কৰি সৰ্বভাৰতীয় পৰ্যায়ত ৩০নং স্থান দখলেৰে শিক্ষানুষ্ঠানখনৰ কাৰণে এক ঈৰ্ষণীয় সাফল্য কঢ়িয়াই আনে।
আন আন শিক্ষাৰ্থীসকলৰ ভিতৰত বি.ফাৰ্ম অষ্টম ষাণ্মাসিকৰ অজয় দাস(স্থান ২৬৯), বনজিৎ কলিত(১১৭২), নয়না ভূঞা (৪৫৬৮), সোমনাথ মণ্ডল(৫২৯৯), ফজিদ আলি(২৬২৫), নিলয় দেউৰী(১৯৯৪৪) লাভ কৰিবলৈ সক্ষম হয়।
সৰ্বভাৰতীয় পৰ্যায়ত লাভ কৰা শিক্ষাৰ্থীসকলৰ এনে সাফল্যত স্বাভাৱিকতে শিক্ষানুষ্ঠানখনৰ সকলো শিক্ষক-শিক্ষয়িত্ৰী উৎফুল্লিত হৈ পৰে।
উল্লেখযোগ্য যে জিপেট(GPAT) হৈছে ভাৰত চৰকাৰৰ মানৱ সম্পদ উন্নয়ন আৰু বিকাশ মন্ত্ৰণালয়ৰ তত্বাৱধানত তথা নেচনেল টেষ্ট এজেঞ্চি চমুকৈ এনটিএ(NTA)ৰ উদ্যোগত অনুষ্ঠিত হোৱা এক সৰ্বভাৰতীয় পৰ্যায়ৰ প্ৰতিযোগিতামূলক পৰীক্ষা, যʼত উত্তীৰ্ণ হোৱা শিক্ষাৰ্থীসকলে ফাৰ্মাচী শিক্ষাৰ বিভিন্ন ধৰণৰ স্নাতকোত্তৰ পৰ্যায়ৰ পাঠ্যক্ৰমসমূহত নামভৰ্তি কৰি জলপানিৰ লগতে আন কিছু আৰ্থিক সাহায্য লাভ কৰি উচ্চ শিক্ষা গ্ৰহণ কৰাৰ সুবিধা পায়।