সদৌ অসম গাঁওৰক্ষী বাহিনীৰ ৭০ তম্ প্ৰতিষ্ঠা দিৱসৰ ৰাজ্যিক অধিৱেশনখনি দুদিনীয়া বৰ্ণাঢ্য কাৰ্যসূচীৰে ২৮ জানুৱাৰি অৰ্থাৎ সোমবাৰৰ পৰা মাজুলী ক্ৰীড়া ক্ষেত্ৰ (ৰাজীৱ গান্ধী ক্ৰীড়া প্ৰকল্প) কমলাবাৰীত অনুষ্ঠিত হৈছে।
প্ৰতিষ্ঠা দিৱসৰ প্ৰথম দিনাৰ কাৰ্যসূচী অনুসৰি দিনৰ ২ বজাত প্ৰতিনিধিৰ পঞ্জীয়নৰ পিছত আবেলি ৪ বজাত প্ৰতিনিধিৰ শিবিৰ মুকলি কৰা হয়। ইয়াৰ পিছতে সন্ধিয়া ৫ বজাত অনুষ্ঠিত হয় এখন প্ৰতিনিধি সভা। উক্ত সভাত কেইবাটাও গুৰুত্বপূৰ্ণ প্ৰস্তাৱ গ্ৰহণ কৰে। এই সভাৰ অন্তত সন্ধিয়া ৭ বজাৰ পৰা সাংস্কৃতিক কাৰ্যসূচী অনুষ্ঠিত হয়।
ইফালে আজি পুৱা ৮ বজাত পতাকা উত্তোলন কৰে মাজুলীৰ আৰক্ষী অধীক্ষক তথা উদযাপন সমিতিৰ সম্পাদক হিতেশ চন্দ্ৰ ৰায়ে। ইয়াৰ পিছতে ৯ বজাত এটা বৰ্ণাঢ্য সাংস্কৃতিক শোভাযাত্ৰা উলিওৱা হয়।
মুকলি সভাত মুখ্য অতিথি হিচাপে মাজুলী সমষ্টিৰ বিধায়ক তথা ৰাজ্যৰ মুখ্য মন্ত্ৰী সৰ্বানন্দ সোণোৱালে অংশগ্ৰহণ কৰিব। ইয়াৰ উপৰি বিশিষ্ট অতিথি হিচাপে সাংস্কৃতিক মন্ত্ৰী নৱ কুমাৰ দলে, শক্তি মন্ত্ৰী তপন গগৈ, অসম চৰকাৰৰ মুখ্য সচিব আলোক কুমাৰ, আৰক্ষী সঞ্চালক প্ৰধান কুলধৰ শইকীয়াৰ লগতে আৰক্ষী বিভাগৰ কেইবাজনো উচ্চ পদস্থ বিষয়া আৰু ভালেসংখ্যক গণ্যমান্য ব্যক্তি উপস্থিত থাকিব।
